பணத்திற்காக பெற்ற தாயை கொலை செய்த மகன்.. சகோதரி கண்டுபிடித்து புகார்..!

உடுப்பி மாவட்டம் மணிப்பாலில், 26 வயது இளைஞர் ஒருவர் பண பிரச்சினை மற்றும் குடும்ப தகராறு காரணமாக தனது தாயை கழுத்தை நெரித்து கொன்ற சம்பவம் பெரும் அதிர்ச்சியையும் கவலையையும் ஏற்படுத்தியுள்ளது.

பத்மபாய் என்ற அந்தப் பெண், இடுப்பு வலி காரணமாக ஜூன் 18 அன்று இரவு உடுப்பி மாவட்ட அரசு மருத்துவமனையில் அனுமதிக்கப்பட்டார். அதே இரவில், அவரது மகன் ஈஷா நாயக், தனது அக்கா ஷில்பாவை தொடர்புகொண்டு தாயின் சிகிச்சைக்காக பணம் கேட்டுள்ளார். ஷில்பாவும் உடனடியாக பணத்தை அனுப்பியுள்ளார்.

மறுநாள் காலை, அதாவது ஜூன் 19 அன்று, பத்மபாய் இறந்துவிட்டதாக ஈஷா, ஷில்பாவுக்கு தகவல் தெரிவித்துள்ளார். மருத்துவமனைக்கு வந்த ஷில்பா, பத்மபாயின் கழுத்தில் சிவப்பு அடையாளங்கள் இருப்பதை கண்டு சந்தேகம் அடைந்தார். உடனடியாக அவர் மணிப்பால் காவல் நிலையத்தில் புகார் அளித்தார்.

ஜூன் 21 அன்று மணிப்பால் மருத்துவமனையின் தடயவியல் துறை மருத்துவ அதிகாரி சமர்ப்பித்த அறிக்கையில், பத்மபாய் ஜூன் 18 இரவுக்கும் ஜூன் 19 காலைக்கும் இடையில் கொலை செய்யப்பட்டிருப்பது உறுதி செய்யப்பட்டது. இதையடுத்து, காவல்துறையினர் வழக்கை கொலை வழக்காக மாற்றினர்.

விசாரணையில், ஈஷா நாயக் பண பிரச்சினைகள் மற்றும் தொடர்ச்சியான குடும்ப சண்டைகள் காரணமாக ஆத்திரத்தில் தனது தாயை கொன்றது தெரியவந்தது. இதையடுத்து, அவர் கைது செய்யப்பட்டு நீதிமன்றத்தில் ஆஜர்படுத்தப்பட்டார்.

இந்தச் சம்பவம் உள்ளூர் மக்களை அதிர்ச்சியில் ஆழ்த்தியுள்ளது. குடும்ப வன்முறை மற்றும் பண பிரச்சினைகள் எப்படி கொடூரமான விளைவுகளை ஏற்படுத்துகின்றன என்பதை இது மீண்டும் ஒருமுறை வெளிச்சம் போட்டுக் காட்டியுள்ளது.

Edited by Siva