”எந்த பட்டனை அழுத்தினாலும் பாஜகவிற்கே ஓட்டு விழும்” என ஹரியானா எம்.எல்.ஏ. ஒருவர் பேசிய வீடியோவை காங்கிரஸ் பொதுச் செயலாளர் ராகுல் காந்தி தனது டிவிட்டர் பக்கத்தில் பகிர்ந்துள்ளார்.
ஹரியானா மாநிலத்தில் இன்று சட்டமன்ற தேர்தல் நடைபெற்றுக்கொண்டிருக்கிறது. இந்நிலையில் காங்கிரஸ் பொதுச்செயலாளர் ராகுல் காந்தி, தனது டிவிட்டர் பக்கத்தில் ஒரு காணொலியை பகிர்ந்துள்ளார்.
அதில், பாஜக எம்.எல்.ஏ. பக்சிஷ் சிங், பிரச்சாரத்தின் போது, வாக்காளர்களை மிரட்டியதாக தெரியவருகிறது. “நீங்கள் யாருக்கு ஓட்டு போட்டாலும், எங்களுக்கு அது தெரிந்துவிடும். மோடியும், மனோகர்லால் கட்டாரும் (ஹரியானாவின் முதல்வர்) மிகவும் புத்திசாலிகள்.” என்று கூறுகிறார்.
மேலும், அதில், “நீங்கள் எந்த பட்டனை அழுத்தினாலும், அது தாமரை சின்னத்துக்கே போய் விழும்” எனவும் கூறியுள்ளார். இந்த காணொலியை ராகுல் காந்தி தனது டிவிட்டர் பக்கத்தில் பகிர்ந்து, ”பிஜேபியின் நேர்மையான மனிதர்” என கேலி செய்துள்ளார்.
