வயநாடு தொகுதியில் கடந்த மே மாதம் மக்களவைத் தேர்தல் நடைபெற்ற போது, ராகுல் காந்தி பெற்ற வாக்குகளை விட தற்போது பிரியங்கா காந்தி அதிக வாக்குகள் பெற்றுள்ளதாக தகவல் வெளியாகியுள்ளது. அந்த தொகுதியின் "செல்லப் பிள்ளை"யாக அவர் மாறி உள்ளதாகவும் கூறப்படுகிறது.
வயநாடு மக்களவைத் தொகுதி வாக்குகள் எண்ணிக்கை நடைபெற்று வரும் நிலையில், பிரியங்கா காந்தி 5 லட்சத்து 78 ஆயிரம் வாக்குகளுக்கும் அதிகமாக பெற்றுள்ளார். பாஜக வேட்பாளர் நவ்யா ஹரிதாஸ் ஒரு லட்சத்து நான்காயிரம் வாக்குகள் பெற்றுள்ளார். கம்யூனிஸ்ட் கட்சியின் வேட்பாளர் சத்யன் ஒரு லட்சத்து 95 ஆயிரம் வாக்குகள் பெற்றுள்ளதும் குறிப்பிடத்தக்கது.
இதன் விளைவாக, பிரியங்கா காந்தி சுமார் 4 லட்சம் வாக்குகள் வித்தியாசத்தில் முன்னிலையில் உள்ளதால், காங்கிரஸ் கட்சியினர் அவரது வெற்றியை உற்சாகமாக கொண்டாடி வருகின்றனர். மேலும் அவர் ராகுல் காந்தி பெற்ற வாக்குகளை விட அதிகம் பெற்றுள்ளார் என்பது குறிப்பிடத்தக்கது.
