100 நாள் வேலைவாய்ப்பு திட்டத்தை 200 நாட்களாகவும் குறைந்தபட்ச ஊதியம் ரூ.700-ஆகவும் உயர்த்தப்படும் உள்ளிட்ட பல்வேறு அறிவிப்புகள் இந்திய கம்யூனிஸ்ட் கட்சியின் தேர்தல் அறிக்கையில் வெளியிடப்பட்டுள்ளது.
நாடாளுமன்ற தேர்தல் ஏழு கட்டங்களாக நடைபெற உள்ளது. முதற்கட்ட தேர்தல் தமிழகம் மற்றும் புதுச்சேரியில் வரும் 19ம் தேதி ஒரே கட்டமாக நடைபெற உள்ளது.
தேர்தலில் பதிவாகும் வாக்குகள் ஜூன் 4ம் தேதி எண்ணப்பட்டு அன்றே முடிவுகள் அறிவிக்கப்பட உள்ளன. இந்நிலையில் நாடாளுமன்றத் தேர்தலுக்கான இந்திய கம்யூனிஸ்ட் கட்சியின் தேர்தல் அறிக்கை வெளியிடப்பட்டுள்ளது. அக்கட்சியின் பொதுச்செயலாளர் டி.ராஜா தேர்தல் அறிக்கையை வெளியிட்டார்.
அதில், புதிய கல்விக் கொள்கை ரத்து செய்யப்படும், பா.ஜ.க.வின் வணிகமயமான, மத ரீதியிலான கல்வித் திட்டங்கள் திரும்பப் பெறப்படும், நிதி ஆயோக்கை கலைத்துவிட்டு, திட்டக்குழு மீண்டும் ஏற்படுத்தப்படும், 100 நாள் வேலைவாய்ப்பு திட்டத்தை 200 நாட்களாகவும் குறைந்தபட்ச ஊதியம் ரூ.700-ஆகவும் உயர்த்தப்படும் என்று வாக்குறுதி அளிக்கப்பட்டது.
பழைய ஓய்வூதியத் திட்டம் மீண்டும் கொண்டுவரப்படும், புதுச்சேரி மற்றும் டெல்லிக்கு மாநில அந்தஸ்து பெற நடவடிக்கை எடுக்கப்படும் என்பன உள்ளிட்ட பல்வேறு அறிவிப்புகள் இந்திய கம்யூனிஸ்ட் கட்சியின் தேர்தல் அறிக்கையில் இடம்பெற்றுள்ளன.
