பழனி முருகன் கோவிலில் வைகாசி விசாக திருவிழா.. கொடியேற்றத்துடன் தொடக்கம்..!

அறுபடை வீடுகளுள் மூன்றாம் இடத்தில் உள்ள பழனி தண்டாயுதபாணி சுவாமி கோவிலில், ஆண்டுதோறும் நடைபெறும் சிறப்புப் பெருவிழாக்களில் ஒன்றான வைகாசி விசாக திருவிழா, இந்த ஆண்டு பாரம்பரிய ஒழுங்குகளுடன் தொடங்கியது.

விழாவின் தொடக்க நிகழ்ச்சியாக இன்று காலை, பெரியநாயகி அம்மன் கோவிலில் கொடியேற்றம் சிறப்பாக நடைபெற்றது. வள்ளி மற்றும் தெய்வானை சமேதமாக முத்துக்குமாரசாமி, அழகிய அலங்காரத்தில் பக்தர்களுக்கு தரிசனமளித்தார். பின்னர், கொடி படத்திற்கு விசேஷ பூஜைகள் செய்யப்பட்டு, அதை கோவிலின் உள்வட்டத்தில் உலா வரவைத்து, வேத மந்திரங்கள் ஒலிக்கும் சூழலில் கொடி உயர்த்தப்பட்டது.

தொடர்ந்து 10 நாட்களுக்கு நீடிக்கும் இந்த விழாவில், தினமும் சுவாமி தங்கமயில், வெள்ளிமயில், ஆட்டுக்கிடா, காமதேனு போன்ற வாகனங்களில் நகரச்சுற்று வந்து பக்தர்களுக்கு அருள் வழங்குவார்.

விழாவின் முக்கிய அம்சமாக, ஜூன் 8ஆம் தேதி இரவு 7 மணிக்கு திருக்கல்யாணம் நடைபெறும். அதனைத் தொடர்ந்து, 8.30 மணிக்கு சுவாமி மணமாலை அலங்காரத்தில் வெள்ளித்தேரில் வீதியுலா வருவார்.

அடுத்த நாள், ஜூன் 9ஆம் தேதி காலை 9.30 மணிக்கு தேரேற்றம், மாலை 4.30 மணிக்கு வைகாசி விசாக தேரோட்டம் நடைபெறும். நான்கு ரதவீதிகளிலும் தேரில் எழுந்தருளும் சுவாமி, பக்தர்களுக்கு காட்சியளிப்பார்.

இவ்விழா, ஜூன் 12ஆம் தேதி காலை நடைபெறும் திருவூடலுடன் நிறைவுபெற்று, அதே நாள் இரவு கொடி இறக்கத்துடன் பூரணமாக முடிவடைகிறது.

Edited by Mahendran