ராகு-கேது பெயர்ச்சி எப்போது? திருநாகேஸ்வரம் கோயில் நிர்வாகம் வெளியிட்ட தகவல்!

2025ஆம் ஆண்டு ராகு-கேது பெயர்ச்சி ஏப்ரல் 26ஆம் தேதி சனிக்கிழமை மாலை 4:20 மணிக்கு நடைபெறவுள்ளதாக திருநாகேஸ்வரம் நாகநாதசுவாமி கோயில் நிர்வாகம் அறிவித்துள்ளது.

கும்பகோணத்துக்கு அருகிலுள்ள திருநாகேஸ்வரம் நகரத்தில் அமைந்துள்ள நாகநாதர் ஆலயம், ராகு பகவானுக்கென தனிச்சன்னதி கொண்டிருப்பதோடு, இத்தலம் நவகிரகங்களில் முக்கியமான பரிகார ஸ்தலமாக கருதப்படுகிறது.

ராகு பகவான், 18 மாதங்கள் கழித்து ஒரு ராசியிலிருந்து மற்றொரு ராசிக்கு இடமாற்றம் செய்யும் தத்துவப்படி, இந்த ஆண்டு மீன ராசியிலிருந்து கும்ப ராசிக்குப் பெயர்ச்சி அடைகிறார். இதையொட்டி, ராகுவுக்கு உகந்த பரிகாரங்களுடன் திருநாகேஸ்வரத்தில் இன்று காலையில் இருந்து பல்வேறு சிறப்பு அபிஷேகங்கள் மற்றும் பூஜைகள் நடத்தப்பட்டன.

பால், தயிர், வெண்ணெய், சந்தனம், பன்னீர், பழங்கள் உள்ளிட்ட பலவகை மங்களப் பொருள்களால் அபிஷேகம் செய்யப்பட்டபின், அங்கு தீபாராதனை நடைபெற்றது. இதில்  பக்தர்கள் கலந்து கொண்டு நாகநாதர் மற்றும் மங்கள ராகுவை தரிசித்தனர்.

இம்முறை நடைபெறும் ராகு பெயர்ச்சி காரணமாக ரிஷபம், மிதுனம், கடகம், சிம்மம், துலாம், விருச்சிகம், மகரம், கும்பம் மற்றும் மீனம் ஆகிய ராசிகளை சேர்ந்தவர்கள் தங்களுக்கேற்ப பரிகாரங்கள் செய்யும் வகையில் ஆலயத்தில் வழிபாடு மேற்கொள்வது நல்லதாகும் என ஜோதிடர்களும் தெரிவிக்கின்றனர்.

Edited by Mahendran