சிவனுக்கு செய்யப்படும் அபிஷேகங்கள்.. என்னென்ன அபிஷேகம் செய்தால் என்ன பலன்கள்?

சிவனுக்கு செய்யப்படும் அபிஷேகங்கள் அற்புதமான பலன்களை அளிக்கின்றன. தூய நல்லெண்ணையில் வாசனை திரவியங்கள் சேர்த்து நூறு குடம் அபிஷேகம் செய்தால், வாழ்க்கையில் நோய்கள் நீங்கி, ஆரோக்கியமான வாழ்வு கிடைக்கும். கோமூத்திரம் கலந்த பஞ்சகவ்யத்தால் பத்து குடம் அபிஷேகம் செய்தால், உடலில் உள்ள அழுக்குகள் நீங்கி தூய்மையான உடலுடன் வாழலாம்.

பசு பால் ஆயிரம் குடம் அபிஷேகம் செய்தால், வாழ்நாள் நீடித்து, தீர்க்காயுசு கிடைக்கும். தேன் கொண்டு அபிஷேகம் செய்தால், மனதின் துயரங்கள் நீங்கி, இனிய குரலும், இசைப்பாடும் திறனும் கிடைக்கும். ஆயிரம் எலுமிச்சம் பழங்களால் அபிஷேகம் செய்தால், அறியாமை விலகி ஞானம் வளர்கிறது. சர்க்கரை நூறு மூட்டை அபிஷேகம் செய்தால், வறுமை நீங்கி மனநிறைவு உண்டாகும்.

இளநீர் ஆயிரம் குடம் அபிஷேகம் செய்தால், பேரானந்தம் கிடைத்து, சிவனடியிலே வாழும் ஆசீர்வாதம் கிடைக்கும். பஞ்சாமிர்தம் அபிஷேகம் செய்தால், மனவீரம் பெருகி, செயல்களில் வெற்றி பெறலாம். தயிரால் அபிஷேகம் செய்தால், செல்வம் பெருகும். கரும்புச்சாறால் அபிஷேகம் செய்தால், உடல் உறுதி உண்டாகும்.

மஞ்சள் தூளால் அபிஷேகம் செய்தால், அரச அருளுக்கு பாத்திரமாகலாம். திராட்சை ரசம் செல்வத்தை கொடுக்கிறது. பசு நெய் அபிஷேகம் செய்தால், சொர்க்கவாழ்வு கிடைக்கும். அரிசி மாவால் அபிஷேகம் செய்தால், கடன்களில் இருந்து விடுபடலாம். தூய கங்கை நீர் நூறு குடம் அபிஷேகம் செய்தால், மன அமைதி கிடைக்கும். சந்தனக் குழம்பு அபிஷேகம் செய்வதால், பக்தி நிலை உயரும். விபூதி அபிஷேகம் செய்தால், அனைத்து ஐஸ்வர்யங்களும் கிடைக்கும். ஒவ்வொரு அபிஷேகத்திற்கும் சுத்தமான நீர் செலுத்தி, மலர்களால் அலங்கரிக்க வேண்டும். இந்த சிவ அபிஷேகங்கள் வாழ்க்கையில் செழிப்பையும் ஆனந்தத்தையும் அளிக்கும்.

Edited by Mahendran