நமக்கு இதெல்லாம் தேவையா ?… சன் கிளாஸோடு பேட் செய்து டக் அவுட் ஆன ஸ்ரேயாஸ்- ட்ரோல் செய்யும் நெட்டிசன்ஸ்!

இந்திய அணியில் குறிப்பிடத்தக்க நடுவரிசை பேட்ஸ்மேனாக வளர்ந்து வந்தார் ஸ்ரேயாஸ் ஐயர். ஆனால் அவருக்கு அடிக்கடி ஏற்படும் காயம் மற்றும் அவரின் சீரற்ற ஆட்டம் ஆகியவற்றால் இப்போது அவரின் இடம் கேள்விக்குறியாகியுள்ளது. தற்போதைக்கு அவருக்கு இந்திய அணியில் ஒருநாள் அணியில் மட்டும்தான் தொடர்ந்து வாய்ப்புகள் கிடைத்து வருகின்றன.

டெஸ்ட் மற்றும் டி 20 அணியில் இடம்பிடிக்க அவர் கடுமையாக உழைத்து தன்னை நிரூபிக்க வேண்டிய கட்டாயத்தில் உள்ளார். இந்நிலையில் தற்போது நடந்து வரும் துலிப் கோப்பை தொடரில் இந்தியா டி அணிக்காக ஆடி வரும் அவர் தொடர்ந்து சொதப்பி வருகிறார்.

இந்நிலையில் நேற்று இந்தியா ஏ அணிக்கு எதிரான ஆட்டத்தில் அவர் பேட் செய்ய வரும் போது சன் கிளாஸ் அணிந்து வந்தார். வழக்கமாக வீரர்கள் பீல்ட் செய்யும் போதோ அல்லது பந்து வீசும்போதோ சன் கிளாஸ் அணிவார்கள். ஆனால் ஸ்டைலாக சன் கிளாஸ் அணிந்து பேட் செய்ய வந்த ஸ்ரேயாஸ் 7 பந்துகளை சந்தித்து ரன் எதுவும் எடுக்காமல் அவுட் ஆகி வெளியேறினார். இதையடுத்து இப்போது அவர் சன் கிளாஸ் அணிந்து வந்தது இணையத்தில் கடுமையான ட்ரோல்களை எதிர்கொண்டு வருகிறது.