இந்திய ஒருநாள் அணி கேப்டன் மகேந்திர சிங் தோனி அதிக சர்வதேச போட்டிகளில் கேப்டனாக பொறுப்பேற்ற வீரர்கள் பட்டியலில் ரிக்கி பாண்டிங் உடன் முதலிடத்தைப் பிடித்துள்ளார்.
நேற்று இந்தியா - ஜிம்பாப்வே இடையிலான மூன்றாவது மற்றும் இறுதி டி 20 போட்டி ஹராரேவில் நடைபெற்றது. இதில், தோனி தலைமையிலான இந்திய அணி 3 ரன்கள் வித்தியாசத்தில் ‘திரில்’ வெற்றி பெற்றது.
இந்த போட்டி மூலம், ஏற்கனவே இந்திய அணிக்கு அதிக வெற்றிகளை குவித்த கேப்டன் என்ற சாதனைக்கு சொந்தக்காரரான மகேந்திர சிங் தோனி, தற்போது அதிக சர்வதேச போட்டிகளில் தலைமையேற்ற கிரிக்கெட் வீரர் என்ற சாதனையை படைத்துள்ளார்.
இதுவரையிலும், 60 டெஸ்ட் போட்டிகளுக்கும், 194 ஒருநாள் போட்டிகளுக்கும், 70 டி20 போட்டிகளுக்கும் என ஒட்டுமொத்தமாக 324 சர்வதேச போட்டிகளில் தோனி கேப்டனாக பொறுப்பேற்று உள்ளார்.
இதன் மூலம் அதிக சர்வதேச போட்டிகளுக்கு கேப்டனாக செயல்பட்ட முன்னாள் ஆஸ்திரேலிய அணி கேப்டன் ரிக்கி பாண்டிங் அவர்களின் சாதனையை தோனி சமன் செய்துள்ளார்.
இவர்களுக்கு அடுத்ததாக, நியூசிலாந்து வீரர் ஸ்டீவன் பிளமிங் (303 போட்டிகள்), தென் ஆப்பிரிக்காவின் கிரீம் ஸ்மித் (286 போட்டிகள்), ஆஸ்திரேலிய வீரர் ஆலன் பார்டர் (271 போட்டிகள்) ஆகியோர் உள்ளனர்.
