சூரியை பெருமிதப்பட வைத்த இது நம்ம ஆளு

கதாநாயகர்களை கலாய்ப்பது கவுண்டமணியின் வழக்கம். சந்தானம் போன்றவர்கள் உதயநிதி போன்ற சின்ன சைஸ் ஹீரோக்களை லேசாக கலாய்ப்பதுண்டு. ஆனால், சிம்பு போன்ற ஒருவரை...?

இது நம்ம ஆளு படத்தில் காட்சிக்கு காட்சி சிம்புவின் காலைவாருகிறார் சூரி. அவரது கவுண்டர் டயலாக்கிற்கு அரங்கு நிறைந்த கைத்தட்டல்கள். இது நம்ம ஆளு படத்திற்கு ரசிகர்கள் மத்தியில் கிடைத்திருக்கும் வரவேற்புக்கு சூரியின் கவுண்டர் டயலாக்குகளுக்கு முக்கியமான பங்கு உண்டு.

இந்தப் படத்தில் சூரி நடிக்கிறார் என்று பாண்டிராஜ் சொன்ன போது மறுப்பு தெரிவித்தார் சிம்பு. சந்தானத்தை போடுங்கள் என்று வற்புறுத்தினார். இல்லை, சூரிதான் சரிவருவார் என்று பிடிவாதமாக சூரியை ஒப்பந்தம் செய்தார் பாண்டிராஜ். ஹீரோவாகிவிட்டதால் காமெடி வேடங்களில் நடிப்பதில்லை என்று சந்தானம் முடிவெடுத்ததும் சிம்பு அடங்கிப் போன காரணமாயிற்று.

முதலில் மறுத்தாலும் சூரியின் காமெடி நடிப்புக்கு முழு ஒத்துழைப்பு தந்தார் சிம்பு. குறிப்பாக காட்சிக்கு காட்சி தன்னை கலாய்க்க சூரிக்கு அனுமதி தந்தார். இப்போது படம் ஹிட்டாகியுள்ளது.

கிராமத்து படங்களில் மட்டுமில்லை, நகரத்து கதைகளிலும் சோபிக்க முடியும் என்பதை சூரி இது நம்ம ஆளு படத்தின் மூலம் நிரூபித்துள்ளார். சிம்பு என்ற மாஸ் நடிகருக்குப் பக்கத்தில் என்னையும் நிற்க வைத்ததற்கு நன்றி என்று பாண்டிராஜுக்கும், சிம்புக்கும் சூரி நன்றி கூறியுள்ளார்.