ரஜினியின் புகழ்பெற்ற என்வழி தனிவழி பன்ச் டயலாக்கை தனது படத்தின் பெயராக்கியிருக்கிறார் ஆர்கே. படத்தை இயக்குகிறவர் மலையாள இயக்குனர் ஷாஜி கைலாஷ்.
இவரது இயக்கத்தில் ஆர்கே எல்லாம் அவன் செயல் படத்தில் நடித்தார். அதில் அவருக்கு வழக்கறிஞர் வேடம். அந்தப் படத்தை இன்றும் ரசிகர்களின் ஞாபகத்தில் வைத்திருப்பது வடிவேலுவின் காமெடி. வட்ட செயலாளர் வண்டு முருகனாக அவர் அடித்த கூத்துகளை மறக்க முடியாது.
சரி, இந்தப் படத்தில்?
வடிவேலு ஹீரோவாகி எட்டாத உயரத்தில் உட்கார்ந்திருக்கிறார். அவரை அணுக முடியாது. அதனால் அவருக்குப் பதில் சிங்கமுத்து, தம்பி ராமையா என்று இரண்டு பேர்களை நடிக்க வைத்துள்ளனர். காமெடிக்கு நடுவில் வடிவேலுவை வாருகிற சில டயலாக்குகளையும் எடுத்துவிட்டிருக்கிறாராம் சிங்கமுத்து.
இந்தப் படத்தில் போலீஸ் அதிகாரியாக நடிக்கிறார் ஆர்கே. அவருக்கு இரண்டு ஜோடிகளாம்.