தமிழக சட்டமன்றத் தேர்தல் புதன்கிழமை 13.4.2011 காலை 8 மணிக்கு சந்திரன் ஹோரையில் எமகண்டத்தில் வாக்குப் பதிவு தொடங்குகிறது. புதன்கிழமை புதன் நட்சத்திரமான ஆயில்யம் நட்சத்திரத்தில் வாக்குப் பதிவு நடைபெறுகிறது. புதன் நேரடியாக வலுவடையாமல் மறைமுகமாக நீச்சபங்க ராஜயோகம் அடைந்திருப்பதால் தேர்தலில் கடுமையான போட்டியிருக்கும். வெற்றித் தோல்விக்குரிய வாக்கு வித்தியாசம் மிகக் குறைவாக இருக்கும்.
14.4.2011 அன்று பிறக்கும் கர வருடம் மிதுன லக்னத்தில் பிறப்பதாலும் கர வருடத்தின் ராஜாவாக சந்திரன் வருவதாலும், வாக்குப்பதிவு தொடங்கும் லக்னம் சுக்ரனின் லக்னமான ரிஷப லக்னமாக வருவதாலும் லக்னாதிபதி சுக்ரன் 10ஆம் இடத்தில் அமர்ந்து கேந்திராதிபத்ய தோஷம் அடைவதாலும் தமிழக சட்டசபை கடைசி கூட்டம் கடந்த 10.2.2011 அன்று பரணி நட்சத்திரத்தில் நடைபெற்றதாலும் தேர்தல் நாளன்று சந்திரன் ஆட்சிப் பெற்று அமர்வதாலும் அதிமுகவுக்கு வெற்றி வாய்ப்பு உள்ளது.
ஆனால் திமுக கட்சியின் ஜாதகமும் திமுக தலைவரின் ராசிக்கு தற்கால கோச்சார கிரகமும் தேர்தல் நாளன்று வலுவாக உள்ளது. எனவே ஆளுங்கட்சியான திமுக கூட்டணி கணிசமான இடங்களை கைப்பற்றும். வாக்குப் பதிவு லக்னம் சுக்ரனாக வருவதாலும், சுக்ரனே ஆறாம் வீட்டிற்கு அதிபதியாக வருவதாலும் கூட்டணி தர்மத்தையும் தாண்டி உள்பகையால் தோற்கும் வேட்பாளர்களின் எண்ணிக்கை அதிகரிக்கும். தேர்தலுக்குப் பின்னர் கூட்டணி மாறும். தனிப்பெரும் கட்சி அருதிப்பெரும்பான்மை பெறுவது கடினம்.
சனிபகவான், குரு, சூரியன், செவ்வாய், புதன், கேது ஆகிய ஐந்து கிரகங்களும் ஐந்து கிரகங்களையும் பார்ப்பதாலும் ஏழாம் வீட்டையும் சனிப் பார்ப்பதாலும் கூட்டணி ஆட்சி அமையும். தேசிய கட்சிகள் (காங்கிரஸ், பா.ஜ.க) மற்றும் சாதிக்கட்சிகள் வலுவிழக்கும். தேர்தல் நாளும், ஓட்டு எண்ணிக்கை நாளும் புதனின் ஆதிக்கத்தில் வருவதால் வாக்குப்பதிவு சதவிகிதம் அதிகரிக்கும். தபால் வாக்குகள் அதிமுகவிற்கு சாதகமாகும்.
தேமுதிக தலைவர் விஜயகாந்திற்கு தற்சமயம் புதன் தசை நடைபெறுவதாலும் புதனின் ஆதிக்கத்தில் தேர்தல் நாளும், எண்ணப்படும் நாளும் வருவதாலும் அவரின் கட்சிக்கு ஒரு அங்கீகாரம் கிடைக்கும். அவர் மூலமாக அதிமுக கூட்டணி வலுவடையும் புதிய வாக்காளர்களுக்கு உரிய கிரகமாக புதன் வருவதாலும் புதன் அதிமுக தலைமைக்கு சாதகமாக இருப்பதால் புதிய வாக்குகள் அதிமுக கூட்டணிக்கு 80% வரை கிடைக்கும்.
கன்னி ராசிக்காரரான வை.கோ புதனின் ராசியில் பிறந்தவர். அவர் அதிமுக கூட்டணியில் இல்லாததால் அதிமுக கூட்டணிக்கு புதனின் பாசிடிவ் கதிர்வீச்சு குறைகிறது. இதனால் அதிமுக அதிக இடங்களை பெற முடியாது. ஆனால் கூட்டணி கட்சிகளின் உதவியுடன் ஆட்சி அமைக்க வாய்ப்புள்ளது.
மிருகசீரிடபம் நட்சத்திரம், ரிஷப ராசியில் பிறந்த திமுக தலைவருக்கு பூர்வ புண்ய ஸ்தானமான 5ஆம் வீட்டில் தற்சமயம் சனி அமர்ந்திருப்பதால் அவர் தனது பூர்வீக தொகுதியான திருவாரூரில் போட்டியிடுவதால் அவருக்கும், அவரது மைந்தனுக்கும் வெற்றித் திணறி வரும். அவரது கட்சிக்கு பாதிப்பை ஏற்படுத்தும்.