திமுக பொதுக்குழு கூட்டம் விரைவில் நடைபெற உள்ள நிலையில் கட்சி பொருளாளர் பதவிக்கு டி.ஆர்.பாலுவுக்கு அதிக வாய்ப்புள்ளதாக தகவல்கள் வெளியாகியுள்ளன.
தமிழகத்தில் சட்டமன்ற தேர்தல் நெருங்கி வருவதால் அரசியல் கட்சிகள் தேர்தல் பணிகளில் தீவிரமாக ஈடுபட தொடங்கியுள்ளன. முன்னதாக திமுக பொது செயலாளர் மற்றும் பொருளாளர் பதவிகளுக்கு நபர்களை தேர்ந்தெடுக்க பொதுக்குழு கூட்டம் மார்ச் மாதம் நடைபெற இருந்த நிலையில் கொரோனா காரணமாக ரத்து செய்யப்பட்டது.
இதனால் திமுக பொது செயலாளர் மற்றும் பொருளாளர் பதவிகளை நிரப்ப செப்டம்பர் 9ம் தேதி திமுக பொதுக்குழு கூட்டம் நடக்க இருப்பதாக அறிவிப்பு வெளியாகியுள்ளது. தற்போது திமுக பொருளாளராக இருக்கும் துரைமுருகன் பொது செயலாளராக தேர்ந்தெடுக்கப்படுவார் என்று பரவலாக பேசிக்கொள்ளப்படுகிறது. இந்நிலையில் பொருளாளர் பதவியை யார் ஏற்பார்கள் என்ற கேள்வி எழுந்துள்ளது.
பொருளாளர் பதவிக்கு ஆ.ராசா, கனிமொழி, ஏ.வ.வேலு மற்றும் டி.ஆர்.பாலு ஆகியோரில் யாராவது ஒருவர் தேர்வு செய்யப்படலாம் என பேச்சு நிலவியது. இந்நிலையில் தற்போது கனிமொழியும், ஆ.ராசாவும் தாங்கள் பொருளாளர் பதவிக்கு போட்டியிட திட்டமிடவில்லை என்றும், அதற்காக விண்ணப்பிக்கவில்லை என்றும் தெரிவித்துள்ளனர். இதனால் திமுக பொருளாளராக டி.ஆர்.பாலு ஒருமனதாக தேர்ந்தெடுக்கப்பட வாய்ப்புகள் உள்ளதாக அரசியல் வட்டாரங்களில் பேச்சு எழுந்துள்ளது.