அண்ணா பிறந்த நாள் நூற்றாண்டு நிறைவை முன்னிட்டு அண்ணா பெயரில் புதிய இணையதளம் தொடங்கப்படும் என செய்தித்துறை அமைச்சர் பரிதிஇளம் வழுதி தெரிவித்துள்ளார்.
சின்ன காஞ்சிபுரத்தில் உள்ள அண்ணாதுரை நினைவிடத்தை பார்வையிட்ட பின் செய்தியாளர்களிடம் அவர் கூறுகையில், ''செப்டம்பர் 15ஆம் தேதி அண்ணா நூற்றாண்டு நிறைவு விழா சென்னை பல்கலைக்கழக நூற்றாண்டு விழா அரங்கில் நடைபெறுகிறது.
இந்த விழாவில் அண்ணா உருவம் பொறித்த நாணயத்தை மத்திய நிதியமைச்சர் பிரணாப் முகர்ஜி வெளியிட, முதலமைச்சர் கருணாநிதி பெற்று கொள்கிறார். அண்ணா நூற்றாண்டு விழா மலரை ஆந்திர முதலமைச்சர் ராஜசேகர ரெட்டி வெளியிடுகிறார்.
அண்ணா பேச்சுகள் அடங்கிய தொகுப்பு நூலை துணை முதலமைச்சர் மு.க.ஸ்டாலின் வெளியிடுகிறார். அண்ணாவின் அனைத்து தகவல்களும் இடம்பெறும் புதிய இணையதளம் தொடங்கப்படுகிறது'' என்றார் பரிதிஇளம் வழுதி.
