அடுத்த கூட்டம் வரை கவாஸ்கர் நீடிப்பார்

ஐ.சி.சி. உயர்மட்டக் குழுவின் அடுத்த கூட்டம் நடைபெறும் வரை கவாஸ்கர் ஐ.சி.சி. கிரிக்கெட் குழு தலைமைப் பொறுப்பில் நீடிப்பார் என்று சர்வதேச கிரிக்கெட் பேரவை தெரிவித்துள்ளது.

ஐ.சி.சி. கிரிக்கெட் குழு தலைவராக இருந்து கொண்டு வர்ணனையாளராகவும், பத்தி எழுத்தாளராகவும் இரட்டை பணியில் கவாஸ்கர் ஈடுபடுவது குறித்து துபாயில் நடந்த ஐ.சி.சி. செயற்குழு கூட்டத்தில் பிரச்சனை எழுப்பப்பட்டது.

ஆனால் இந்த விவகாரம் குறித்து மால்கம் ஸ்பீடுடன் சுனில் கவாஸ்கர் பேசியுள்ளார். இதனால் உடனடியான நடவடிக்கை ஏதும் இல்லை என்று தெரிகிறது.

ஐ.சி.சி ஆண்டுக் கூட்ட வாரத்தில் உய‌ர்மட்டக் குழு இந்த விவகாரத்தை மீண்டும் விவாதிக்க உள்ளது. ஐ.சி.சி. கிரிக்கெட் குழுக் கூட்டம் வரும் மே மாதம் 5, 6ஆம் தேதிகளில் நடைபெறுகிறது. ஐ.சி.சி. ஆண்டு கூட்ட வார‌ம் ஜூன் 29, ஜூலை 4 ஆகிய தேதிகளில் நடைபெறுகிறது.

அதுவரை கவாஸ்கர் ஐ.சி.சி. பதவியில் நீடிப்பார் என்று தெரிகிறது.