நாடாளுமன்ற தேர்தல் அடுத்த மாதம் (ஏப்ரல்) 7 ஆம் தேதி தொடங்கி 9 கட்டங்களாக நடைபெறுகிறது. தமிழ்நாட்டில் ஓரே கட்டமாக ஏப்ரல் 24 ஆம் தேதி தேர்தல் நடைபெறுகிறது. ஏற்கனவே இதற்கான அறிவிப்பை வெளியிட்ட தலைமை தேர்தல் ஆணையம், நாடு முழுவதிலும் உள்ள 543 நாடாளுமன்ற தொகுதிகளிலும் காலை 8 மணி முதல் மாலை 5 மணி வரை வாக்குப்பதிவு நடைபெறும் என்று அறிவித்திருந்தது.
கடுமையான வெயில் மற்றும் சூரியன் உதயம், அஸ்தமன நேரத்தை கணக்கில் கொண்டு வாக்குப்பதிவுக்கு கூடுதல் நேரம் ஒதுக்க வேண்டும் என்று, பல்வேறு தரப்பில் இருந்து தேர்தல் ஆணையத்துக்கு கோரிக்கை வைக்கப்பட்டிருந்தது. அது குறித்து தலைமை தேர்தல் ஆணையர் வி.எஸ்.சம்பத், மற்ற இரு ஆணையர்களான பிரம்மா, நசீம் சைதி ஆகியோருடன் ஆலோசனை நடத்தினார்.