ஆஸ்கார் விருது: குடியரசுத் தலைவர் வாழ்த்து

ஸ்லம்டாக் மில்லியனர் படம் 8 ஆஸ்கார் விருதுகளை வென்றிருப்பதற்கு குடியரசுத் தலைவர் பிரதிபா பாட்டீல், அந்தப் படக் குழுவினருக்கு வாழ்த்துகளையும், பாராட்டுகளையும் தெரிவித்துள்ளார்.

லாஸ் ஏஞ்சல்ஸில் நேற்று நடைபெற்ற ஆஸ்கார் விருது வழங்கும் விழாவில் தமிழகத்தைச் சேர்ந்த ஏ.ஆர். ரஹ்மான் உட்பட ஸ்லம்டாக் படத்தில் பணியாற்றிய 8 பேருக்கு ஆஸ்கார் விருது வழங்கப்பட்டது.

இதையடுத்து அந்தப் படத்தில் பணியாற்றிய குழுவினருக்கு பாராட்டுகள் குவிந்தவண்ணம் உள்ளன.

சிறந்த பாடல் மற்றும் பின்னணி இசைக்காக 2 விருதுகளை வென்றுள்ள ஏ.ஆர். ரஹ்மானுக்கும், பாடலாசிரியர் குல்சாருக்கும், ஒலிக்கலவைக்காக விருது பெற்றுள்ள பூக்குட்டிக்கும் குடியரசுத் தலைவர் தமது வாழ்த்துகளைத் தெரிவித்துக் கொண்டிருப்பதாக குடியரசுத் தலைவர் மாளிகை செய்திக்குறிப்பு தெரிவிக்கிறது.

மேலும் `ஸ்மைல் பிங்கி' படம் மிகச் சிறந்த ஆவணப்படமாகத் தேர்வு செய்யப்பட்டிருப்பதற்கும் பிரதிபா பாட்டீல் வாழ்த்து தெரிவித்துள்ளார்.