டெல்லியில் 2 தீவிரவாதிகள் சுட்டுக்கொலை!

தலைநகர் டெல்லியில் கடந்த சனியன்று தொடர் குண்டு வெடிப்புகள் நடந்துள்ள நிலையில், 2 தீவிரவாதிகள் சிறப்பு காவல்படையினரால் சுட்டுக் கொல்லப்பட்டுள்ளனர்.

அகமதாபாத் தொடர் குண்டுவெடிப்பில் கைது செய்யப்பட்ட அபு பஷாரை நேற்று டெல்லிக்கு அழைத்துச் சென்ற காவல்துறையினர், அவனிடம் தீவிர விசாரணை நடத்தினர். இதில் தாங்கள் ஜமியா நகர் பகுதியில் கலிலுல்லா மசூதிக்கு அருகே 4 அடுக்குமாடிக் குடியிருப்பில் பதுங்கியிருந்ததை பஷார் ஒப்புக்கொண்டான்.

இதன் அடிப்படையில், பஷார் குறிப்பிட்ட குடியிருப்பு பகுதியில் இன்று சோதனை நடத்தியதாகவும், அப்போது அங்கு 5 தீவிரவாதிகள் பதுங்கி இருந்ததும் தெரியவந்ததாக சிறப்பு காவல்படையின் இணை ஆணைய‌ர் கர்னெய்ல் சிங் செய்தியாளர்களிடம் தெரிவித்தார்.

இதையடுத்து தீவிரவாதிகளுக்கும், சிறப்பு படையினருக்கும் இடையே சுமார் ஒரு மணி நேரம் தீவிர துப்பாக்கிச் சண்டை நடந்ததாகவும் இதில் 2 தீவிரவாதிகள் கொல்லப்பட்டதாகவும், 2 காவல்படையினர் காயமடைந்ததாகவும் அவர் கூறினார்.

இறந்த தீவிரவாதிகளில் ஒருவன் அகமதாபாத், டெல்லி தொடர் குண்டுவெடிப்பில் சம்பந்தப்பட்ட அடிக் மற்றும் மற்றொருவன் அவனது கூட்டாளி என்றும் தெரிவிக்கப்பட்டுள்ளது.

மேலும் அங்கிருந்த 3 தீவிரவாதிகளில் ஒருவரை காவல்படையினர் கைது செய்ததாகவும், மீதமுள்ள இருவர் தப்பி விட்டதாகவும் கர்னெய்ல் சிங் தெரிவித்தார்.