இஸ்லாமாபாத்: பயங்கரவாத எதிர்ப்பு படை வளாகம் மீது தாக்குதல்!

பாகிஸ்தான் தலைநகர் இஸ்லாமாபாத்தில் இயங்கி வரும் பயங்கரவாத எதிர்ப்பு படையினரின் அலுவலக கட்டிட வளாகத்தின் மீது இன்று கார் குண்டு தாக்குதல் நடத்தப்பட்டது. இதில் 4 பேர் படுகாயமடைந்தனர்.

காவல்துறையினரின் குடியிருப்புகள் மற்றும் பயிற்சிக் காவலர்கள் தங்கியுள்ள இந்த கட்டிடத்திற்கு அளிக்கப்பட்ட பலத்த பாதுகாப்பையும் மீறி, தற்கொலைப்படை தீவிரவாதிகள் காரில் வந்து தாக்குதல் நடத்தியுள்ளனர்.

முதற்கட்டமாக 8 பேர் உயிரிழந்ததாக தகவல்கள் வெளியிடப்பட்டாலும், தாக்குதலுக்கு உள்ளான இடத்தை நேரில் பார்வையிட்ட பின்னர் பேசிய இஸ்லாமாபாத் காவல்துறை தலைவர் அஸ்கர் ரஸா கர்தேஸி, 4 காவலர்கள் மட்டுமே காயமடைந்துள்ளனர் என்றார்.

சக்தி வாய்ந்த இந்த குண்டுவெடிப்பின் காரணமாக எழுந்த சத்தம் பல கி.மீ தூரத்திற்கு கேட்டது என்றும், கட்டிட வளாகத்தின் முகப்புப் பகுதி முற்றிலுமாக சேதமடைந்ததாகவும் தகவல்கள் தெரிவிக்கின்றன.