வேட்டைக்காரன் டிசம்பர் 18ஆம் தேதி திரைக்கு வருகிறது. படம் பொங்கலுக்கு வரும் என்று எதிர்பார்த்த விஜய் ரசிகர்களுக்கு இதில் ஏமாற்றம்தான்.
தீபாவளிக்குப் பிறகு பெரிய நடிகர்களின் பிரமாண்ட படங்கள் தீபாவளி, பொங்கல் போன்ற திருவிழா நாட்களில் மட்டுமே ரிலீஸ் செய்ய வேண்டும் என்ற புதிய கட்டுப்பாட்டை தயாரிப்பாளர்கள் சங்கம் விதித்திருந்தது. அதேபோல் சிறிய பட்ஜெட் நேரடி தமிழ்ப் படங்கள் வாரத்துக்கு இரண்டு மட்டுமே வெளியிடப்பட வேண்டும் என்றும் தீர்மானம் நிறைவேற்றினார்கள்.
இரண்டாவது தீர்மானம் நேற்று பிசுபிசுத்தது. நேற்று மட்டும் அதேநேரம் அதேஇடம், சா பூ திரி, பாலைவனச்சோலை, தம்பிவுடையான் என நான்கு படங்கள் ரிலீஸாயின. முதல் தீர்மானத்தை நசுக்க வருகிறது வேட்டைக்காரன்.
தயாரிப்பாளர்கள் சங்கத்தின் தீர்மானப்படி வேட்டைக்காரன் பொங்கல், புது வருடப் பிறப்பு போன்ற தினங்களில்தான் வெளியிடப்பட வேண்டும். ஆனால் எந்த திருவிழாவும் இல்லாத டிசம்பர் 18 படம் திரைக்கு வருகிறது. ரொம்ப அழுத்தி கேட்டால், 25 கிறிஸ்துமஸ், அதையொட்டிதான் படம் திரைக்கு வருகிறது என்று உறுமியடிக்கிறார்கள்.
பெரிய இடத்து விவகாரம் என்றால் விதிமுறையும் விடுமுறைக்கு போய்விடுமாம்.