ஆஸ்திரேலியாவின் முன்னனி வேகப்பந்து வீச்சாளார் 34 வயதான மிச்சேல் ஜான்சன் பெர்த்தில் இன்று முடிந்த நியூசிலாந்துக்கு எதிரான டெஸ்டோடு சர்வதேச போட்டிகளில் இருந்து ஓய்வு பெற்றார்.
73 டெஸ்டில் விளையாடிய மிச்சேல் ஜான்சன் 311 விக்கெட்களை கைப்பற்றியுள்ளார். 153 ஒரு நாள் போட்டிகளில் விளையாடிய அவர் 239 விக்கெட்களை கைப்பற்றியுள்ளார்.
டெஸ்டில் 61 ரன்கள் கொடுத்து 8 விக்கெட்களை கைப்பற்றி தனது சிறந்த பந்துவீச்சை பதிவு செய்த ஜான்சன், 12 முறை 5 விக்கெட்களுக்கு அதிகமாகவும், 3 முறை 10 விக்கெட்களுக்கு அதிகமாகவும் கைப்பற்றி உள்ளார்.
ஒரு நாள் போட்டிகளில் 31 ரன்கள் கொடுத்து 6 விக்கெட்களை கைப்பற்றி தனது சிறந்த பந்துவீச்சை பதிவு செய்த ஜான்சன், 30 இருபது ஓவர் போட்டிகளில் விளையாடி 38 விக்கெட்களை கைப்பற்றியுள்ளார்.
தனது ஓய்வு முடிவு குறித்து பேசிய ஜான்சன், ”ஓய்வு பெறுவதற்கு இதுவே சரியான நேரமாகும். மிகுந்த மகிழ்ச்சியுடன் ஓய்வு முடிவை அறிவிக்கிறேன். எனது கிரிக்கெட் பயணம் நம்ப முடியாத வகையில் இருந்தது. எந்த ஒரு பயணத்துக்கும் முடிவு உண்டு. ஆஸ்திரேலிய அணிக்காக நான் நீண்ட காலம் சிறப்பாக பந்துவீசியது மிகுந்த மகிழ்ச்சியை ஏற்படுத்தியது என்றார்.”