அமெரிக்காவில் இந்தியா 11 பில்லியன் டாலர்கள் முதலீடு செய்துள்ளதும், அங்கு 1,00,000 புதிய வேலைவாய்ப்புகளை இந்தியா உருவாக்கியுள்ளதும் தெரியவதுள்ளது.
அமெரிக்காவில் இந்திய முதலீடு குறித்து, அமெரிக்க - இந்திய வர்த்தக சபை ஆய்வு ஒன்றை நடத்தியது. ‘அமெரிக்காவில் முதலீடு, அமெரிக்காவில் வேலைகளை உருவாக்க இந்தியா எப்படி உதவுகிறது‘ (' Investing in America, How India Helps Create American Jobs' ) என்ற தலைப்பில் இந்த ஆய்வு நடத்தப்பட்டது.
இதில் இந்தியாவுடனான பரஸ்பர மற்றும் வர்த்தக உறவுகள் மூலம் அமெரிக்காவின் பொருளாதாரம் அடையும் பயன்கள் குறித்து விரிவாக தெரிவிக்கப்பட்டுள்ளது.
அதன்படி, இந்தியா, அமெரிக்காவில் 11 பில்லியன் டாலர் முதலீடு செய்துள்ளதாகவும், இதனால் அமெரிக்காவில் 1 லட்சம் புதிய வேலைகள் உருவாக்கப்பட்டிருப்பதாகவும் கூறப்பட்டுள்ளது.
மேலும், கடந்த ஆண்டு அக்டோபர் மாதம் அமெரிக்காவில் துணை செயலாளர் வில்லியம் பர்ன்ஸ், 2000 ஆம் ஆண்டு முதல் 2010 ஆம் ஆண்டுவரை அமெரிக்காவில் இந்திய முதலீடு 200 மில்லியனிலிருந்து 5 பில்லியனாக உயர்ந்ததையும், அப்போது இந்தியாவால் அமெரிக்காவில் 50,000 புதிய வேலைகள் உருவாக்கப்பட்டதையும் கூறியிருந்தது குறிப்பிடத்தக்கது.