தமிழ் சினிமாவின் ஆடியோ விற்பனை பல ஆண்டுகளாக பாதாளத்தில்தான் உள்ளது. இசையமைப்பாளர்களுக்கு தயாரிப்பாளர்கள் தரும் சம்பளத்தில் சிறு பகுதிகூட, ஆடியோ உரிமை விற்பனையால் திருப்பி கிடைப்பதில்லை.
ஆடியோ நிறுவனங்களுக்கு குறைந்த விலையில் இசை உரிமையை ஏன் தர வேண்டும் என்று விஷால், ஞானவேல்ராஜா போன்றவர்கள் சொந்தமாக ஆடியோ நிறுவனம் தொடங்கி தங்கள் படத்தின் இசையை தாங்களே வெளியிடுகின்றனர்.
ஆனால், இசையமைப்பாளர் யுவன் தொடங்கியிருக்கும், யுவன்1 என்ற ஆடியோ நிறுவனம் சற்று வித்தியாசமானது. இதன் மூலம் இளம் இசையமைப்பாளர்களின் தனி ஆல்பங்களையும் வெளியிட இருக்கிறார். சினிமாவுக்கு வெளியே இசையார்வத்துடன் இயங்கும் இளைஞர்களுக்கு தங்கள் திறமையை வெளிப்படுத்த இந்த நிறுவனம் ஒரு வாசலாக அமையும்.
