அமரன் படத்தின் கலெக்‌ஷன் எனக்கு ரொம்ப முக்கியம்… சிவகார்த்திகேயன் மகிழ்ச்சி!

தமிழகத்தைச் சேர்ந்த ராணுவ அதிகாரியான மேஜர் முகுந்த் வரதராஜனின் வாழ்க்கை வரலாற்றை அடிப்படையாகக் கொண்டு, நடிகர் சிவகார்த்திகேயன் நடிப்பில் உருவான ‘அமரன்’ திரைப்படம் அக்டோபர் 31 தீபாவளி அன்று திரையரங்குகளில் வெளியானது.

தீபாவளியை முன்னிட்டு அமரன், பிரதர், பிளடி பெக்கர் மற்றும் லக்கி பாஸ்கர் ஆகிய படங்கள் வெளியானாலும் அதில் அமரன் மற்றும் லக்கி பாஸ்கர் ஆகிய படங்கள் மட்டுமே பாசிட்டிவ்வான விமர்சனங்களைப் பெற்றுள்ளன. அமரன் படம் முதல் நாளில் சுமார் 42 கோடி ரூபாய் அளவுக்கு வசூலித்துள்ளதாக அதிகாரப்பூர்வ அறிவிப்பு வெளியானது. அடுத்தடுத்த நாட்களிலும் வசூலில் முன்னிலையில் இருந்தது.

இந்நிலையில் நேற்று நடந்த அமரன் வெற்றிச் சந்திப்பில் பேசிய நடிகர் சிவகார்த்திகேயன் “இப்போதே படம் 150 கோடி ரூபாய் வசூலித்துள்ளதாக சிலர் சொல்கிறார்கள். மேலும் ஒரு பெரிய தொகையை சொல்லி அவ்வளவு ரூபாய் வசூலிக்க வாய்ப்புள்ளதாக சொல்கிறார்கள். எனக்கு கலெக்‌ஷன் முக்கியம். ஏனென்றால் அப்போதுதான் என்னால் இன்னும் பெரிய படங்களை தமிழ் ரசிகர்களுக்குக் கொடுக்க முடியும்” எனப் பேசியுள்ளார்.