ஹரிஷ் கல்யாண் நடிக்கும் படத்துக்கு சென்னையின் பிரபல ஏரியாவின் பெயர்தான் டைட்டிலா?

தமிழ் சினிமாவின் வளர்ந்து வரும் இளம் நடிகராக ஹரிஷ் கல்யாண் உருவாகி வருகிறார். இவர் அமலா பால் நடிப்பில் வெளியாகி பெரும் சர்ச்சைக்குள்ளான சிந்து சமவெளி திரைப்படத்தில் நடித்து அறிமுகமானார். அதன் பிறகு பொறியாளன் திரைப்படத்தின் மூலம் ஹீரோவானார். தொடர்ந்து வாய்ப்பில்லாமல் இருந்து வந்த அவர் பிக்பாஸ் முதல் சீசனில் கலந்துக்கொண்டு பெரும் பிரபலமானார்.

சமீபத்தில் அவர் நடித்த பார்க்கிங் மற்றும் லப்பர் பந்து ஆகிய திரைப்படங்கள் சூப்பர் ஹிட்களாகி தற்போது அவரை நிலையான மார்க்கெட் கொண்ட நடிகராக ஆக்கியுள்ளன. இப்போது அவர் நடிப்பில் டீசல், நூறு கோடி வானவில் ஆகிய படங்கள் தயாரிப்பில் உள்ளன.

இந்நிலையில் ஹரிஷ் கல்யாண் அடுத்து பிரம்மாண்டமான படம் ஒன்றில் நடித்து வருகிறார்.. இந்த படத்தை லிஃப்ட் படத்தை இயக்கிய வினீத் வரபிரசாத் இயக்கி தயாரிக்கிறார்.. பேன் இந்தியா படமாக உருவாகும் இந்த படத்தில் பாலிவுட் நடிகர் ஜாக்கி ஷ்ராஃப் ஒரு முக்கிய வேடத்தில் நடிக்கவுள்ளார். இந்நிலையில் இந்த படத்துக்கு சென்னையின் பிரபல பகுதிகளில் ஒன்றான ‘தாஷமாக்கான்’ என்பதைத் தலைப்பாக வைத்துள்ளார். இந்த பகுதியில் விதவிதமான மாட்டிறைச்சி உணவுகள் கிடைக்கும் என்பது குறிப்பிடத்தக்கது.