படம் ரிலீஸாகும்போதும் ரேஸில் பிஸி! போர்ச்சுக்கலில் அஜித்குமார் கார் ரேஸ்!

அஜித்குமாரின் விடாமுயற்சி படம் இன்று ரிலீஸ் ஆகும் நிலையில், அஜித்குமாரோ போர்ச்சுக்கல் நாட்டில் கார் ரேஸில் பிஸியாக இருக்கிறார்.

தமிழ் சினிமாவில் ஏராளமான ரசிகர்களை கொண்ட முக்கிய நடிகராக அஜித்குமார் உள்ளார். அஜித் நடித்துள்ள விடாமுயற்சி திரைப்படம் இன்று திரையரங்குகளில் வெளியாகிறது. மகிழ் திருமேனி இயக்கியுள்ள இந்த படத்தில் த்ரிஷா, அர்ஜூன், ஆரவ், ரெஜினா உள்ளிட்ட பலர் நடித்துள்ளனர்.

ஒரு பக்கம் திரைப்படங்களில் நடிப்பது என்றால் மறுபக்கம் கார் ரேஸை தனது கனவாகக் கொண்டிருக்கிறார் அஜித்குமார். இன்று அவரது விடாமுயற்சி படம் ரிலீஸாகும் தருணத்திலும் கூட அவர் போர்ச்சுக்கலில் உள்ளார். அவரது அஜித்குமார் ரேஸிங் போர்ச்சுகலில் நடக்கும் வார இறுதி கார் ரேஸ் போட்டியில் கலந்து கொள்கிறது.

போர்ச்சுக்கலில் உள்ள கார் ரேஸ் மைதானத்தில் அஜித் நடந்து செல்லும் வீடியோக்கள் சமூக வலைதளங்களில் வைரலாகி வரும் நிலையில் விடாமுயற்சி படத்தின் வெற்றிக்கும், விடாமுயற்சியுடன் ரேஸில் வெற்றி பெறுவதற்கும் ரசிகர்கள் அஜித்தை வாழ்த்தி வருகின்றனர்.

Edit by Prasanth.K