சோனம் கபூர் நடிப்பில் வரும் 19ஆம் தேதி வெளியாக உள்ள நீர்ஜா படத்தை பாகிஸ்தானில் வெளியிட தற்போது தடை விதிக்கப்பட்டுள்ளது.
பிரபல பாலிவுட் இயக்குனர் ராம் மத்வானி இயக்கத்தில் பாலிவுட் நடிகை சோனம் கபூர் நடிப்பில் உருவாகியுள்ள நீர்ஜா திரைப்படம், கடந்த 1986ஆம் ஆண்டு கராச்சி விமான நிலையத்தில் இருந்து தீவிரவாதிகள் விமானத்தை கடத்தியபோது, அந்த விமானத்தில் இருந்த பயணிகளைக் காப்பாற்ற முயன்ற விமான பணிப்பெண் நீர்ஜா பனோட்டை தீவிரவாதிகள் சுட்டுக் கொன்றதை மையப்படுத்தி உருவாக்கப் பட்டுள்ளது. இந்த திரைப்படத்தில் நீர்ஜாவாக சோனம் கபூர் நடித்துள்ளார். இப்படம் வரும் 19ம் தேதி உலகம் முழுவதும் ரிலீஸாக உள்ளது.
இதையடுத்து, பாகிஸ்தானில் இந்தப் படத்தை வெளியிடுவதற்கு தற்போது தடை விதிக்கப்பட்டுள்ளதாக அந்நாட்டு அரசு அறிவித்துள்ளது. மேலும், நீர்ஜா படத்தில் பாகிஸ்தானுக்கு எதிரான கருத்துக்கள் இடம்பெற்றிருப்பதால் தடை விதிக்கப்பட்டுள்ளதாக அந்நாட்டு அரசு உயர் அதிகாரி ஒருவர் தெரிவித்துள்ளார்
அந்த படத்தை வாங்கி வெளியிடுவதற்கு முதலில் தடையில்லா சான்று அளித்த அந்நாட்டு தகவல் மற்றும் வர்த்தகத்துறை பின்னர் அதனை விலக்கிக்கொண்டுவிட்டதாக தற்போது அறிவித்துள்ளது. இதனால், அந்நாட்டு கேபிள் மூலம் உள்ளூர் தொலைக்காட்சிகளில் அந்த படத்தை காண்பிக்கக்கூடாது என்று பாகிஸ்தான் மின்னணு ஊடக ஒழுங்குமுறை ஆணையத்திடம் தெரிவித்துள்ளது.