சச்சினின் இந்த சாதனையை கோலியால் தொடமுடியாது… பயிற்சியாளர் கருத்து!

இந்திய அணியின் முன்னாள் கேப்டன் விராட் கோலி 100 டெஸ்ட் போட்டிகள் என்ற மைல்கல்லை தொட்டார்.

இந்திய பேட்ஸ்மேன்களில் முக்கியமானவராக விளங்குபவர் விராட் கோலி. தோனிக்கு பிறகு கேப்டனாக சிறப்பாக செயல்பட்டு வந்த கோலி தற்போது அனைத்து வகை போட்டிகளிலும் கேப்டன் பதவியிலிருந்து விலகியுள்ளார். இன்று நடைபெற்று வரும் இலங்கை – இந்தியா டெஸ்ட் போட்டியில் விராட் கோலி விளையாடி வரும் நிலையில் இது அவரது 100வது டெஸ்ட் போட்டியாகும்.

இதனை கௌரவிக்கும் வகையில் விராட் கோலிக்கு 100 எண் பொறித்த தொப்பியை தலைமை பயிற்சியாளர் ராகுல் டிராவிட் பரிசாக வழங்கியுள்ளார். கிரிக்கெட் ரசிகர்கள் கோலியின் இந்த 100வது டெஸ்டை ஹேஷ்டேகுகள் மூலம் கொண்டாடி வருகின்றனர்.

சச்சினின் 100 சர்வதேச சதங்கள் என்ற சாதனையை முறியடிக்க வாய்ப்புள்ள ஒரே வீரராக கோலி கருதப்படுகிறார். இதுகுறித்து பேசியுள்ள இந்திய அணியின் முன்னாள் பயிற்சியாளர் அன்ஷுமான் கெய்க்வாட் ‘கோலி சச்சின் ஒருநாள் போட்டிகளில் அடித்த 49 சதங்கள் என்ற சாதனையை சமன் செய்வார். ஆனால் அவர் சச்சின் 200 டெஸ்ட் போட்டிகளில் விளையாடியதை எப்போது  முறியடிக்க முடியாது. கோலி ஃபிட்டாக இருக்கும் வரை அவரை யாராலும் தொட முடியாது’ எனக் கூறியுள்ளார்.