கனமழை எதிரொலி: எந்தெந்த மாவட்டங்களுக்கு பள்ளி, கல்லூரிகளுக்கு விடுமுறை..!

வங்க கடலில் ஏற்பட்ட காற்றழுத்த தாழ்வு காரணமாக தமிழகம் முழுவதும் பரவலாக கனமழை முதல் அதி கனமழை வரை பெய்யும் என்று ஏற்கனவே வானிலை ஆய்வு மையம் எச்சரிக்கை விடுத்திருந்த நிலையில் நேற்று இரவு முதல் சில மாவட்டங்களில் மழை பெய்து வருவதாக தகவல் வெளியாகி உள்ளன.

இதை அடுத்து சில மாவட்டங்களில் பள்ளி கல்லூரிகளுக்கும் ஒரு சில மாவட்டங்களில் பள்ளிகளுக்கு மட்டும் விடுமுறை என்று அறிவிக்கப்பட்டுள்ளது. கரூர், வேலூர், தூத்துக்குடி, திருப்பத்தூர் ஆகிய மாவட்டங்களில் பள்ளிகளுக்கு மட்டும் இன்று விடுமுறை என்றும் திருவண்ணாமலை மாவட்டத்தில் பள்ளி கல்லூரிகளுக்கு இன்று விடுமுறை என்றும் அறிவிக்கப்பட்டுள்ளது.

மேலும் ராணிப்பேட்டை, திருவள்ளூர் ஆகிய மாவட்டங்களில் பள்ளிகளுக்கு மட்டும் இன்று விடுமுறை என்றும், அரியலூர், செங்கல்பட்டு மாவட்டங்களிலும் பள்ளிகளுக்கு இன்று விடுமுறை என்றும் அறிவிக்கப்பட்டுள்ளது. மேலும் திருவாரூர், காஞ்சிபுரம் ஆகிய மாவட்டங்களிலும் பள்ளிகளுக்கு இன்று விடுமுறை என்றும் ராமநாதபுரம்,திண்டுக்கல் மாவட்டங்களிலும் பள்ளிகளுக்கு மட்டும் இன்று விடுமுறை என்றும் அறிவிக்கப்பட்டுள்ளது.

மேலும் சென்னை, விழுப்புரம், புதுக்கோட்டை, மயிலாடுதுறை, தஞ்சாவூர், கடலூர் ஆகிய மாவட்டங்களிலும் பள்ளிகளுக்கு மட்டும் இன்று விடுமுறை என்று அறிவிக்கப்பட்டுள்ளது, இன்னும் சில மாவட்டங்களில் பள்ளிகள் விடுமுறை குறித்த அறிவிப்பு விரைவில் வெளியாகலாம் என்று எதிர்பார்க்கப்படுகிறது.

Edited by Siva