அமெரிக்க துணை ஜனாதிபதி பதவிக்காக போட்டியிடும் இந்திய வம்சாவளி கமலா ஹாரிஸ் வெற்றி பெற வாழ்த்தி மன்னார்குடியில் வைக்கப்பட்டுள்ள பேனர் வைரலாகியுள்ளது.
அமெரிக்காவில் நவம்பர் மாதம் ஜனாதிபதி தேர்தல் நடைபெற உள்ளது. இந்த தேர்தலில் ஜனநாயக கட்சியின் சார்பில் துணை ஜனாதிபதி பதவிக்கு போட்டியிடுகிறார் கமலா ஹாரிஸ். இவரது தாத்தா கோபாலன் மன்னார்குடி அருகே உள்ள துளசேந்திரபுரத்தை சேர்ந்தவர். அதனால் கமலா ஹாரிஸின் வெற்றியை அமெரிக்காவை விட மன்னார்குடியினர் ஆர்வமாக எதிர்பார்த்து காத்துள்ளனர்.
இந்நிலையில் தங்கள் ஊரை சேர்ந்த பெண் அமெரிக்க தேர்தலில் வெற்றி பெற வேண்டும் என வாழ்த்தி துளசேந்திரபுரம் கிராம மக்கள் பேனர் வைத்துள்ளனர். கிராம மக்கள் மட்டுமன்றி அப்பகுதியை சேர்ந்த அரசியல் கட்சியினரும் தங்கள் கட்சி சார்பில் கமலா ஹாரிசுக்கு வாழ்த்துக்கள் தெரிவித்து சமூக வலைதளங்களில் போஸ்டர்களை பகிர்ந்து வருகின்றனர். இதனால் உள்ளூர் தேர்தல் அளவிற்கு அமெரிக்க தேர்தலும் தமிழகத்தில் முதல்முறையாக உற்று நோக்கப்படுவதாக தெரிகிறது.