மாணவிகள் மட்டும் படிக்கும் பள்ளிகளில் வழிகாட்டு நெறிமுறைகள்: பள்ளிக்கல்வித்துறை அறிவிப்பு..!

பள்ளிகளில் மாணவர்கள் மற்றும் மாணவிகளின் பாதுகாப்பை உறுதியாக செய்கிற வகையில், தமிழக பள்ளிக்கல்வித்துறை பல முக்கிய அறிவுறுத்தல்களை வெளியிட்டுள்ளது. இவை, பள்ளிகளில் செயல்படும் அனைவரும் கடைப்பிடிக்க வேண்டிய முக்கிய நடவடிக்கைகள் என குறிப்பிடப்படுகிறது.

முதலில், பள்ளி வளாகங்களில் பாலியல் தொடர்பான குற்றச்செயல்கள் முற்றிலுமாக தவிர்க்கப்பட வேண்டும். இதற்காக, ஆசிரியர்களுக்கு தேவையான விழிப்புணர்வு மற்றும் கையாளும் திறன் பற்றிய பயிற்சி ஏற்கனவே வழங்கப்பட்டுள்ளது. இருப்பினும், அடுத்த ஆறு மாதங்களில் அனைத்து ஆசிரியர்களுக்கும் மீண்டும் முழுமையான பயிற்சி அளிக்க திட்டமிடப்பட்டுள்ளது. அதன் பிறகு, ஆறு மாதங்களுக்கு ஒருமுறை புதுப்பிப்பு பயிற்சியும் வழங்கப்பட வேண்டிய கட்டாயம் விதிக்கப்படுகிறது.

மாணவிகள் பயணம் செய்யும் வாகனங்களில் பெண் உதவியாளர்கள் இருக்க வேண்டும். விளையாட்டு விழாக்கள், கல்விச் சுற்றுலாக்கள் மற்றும் பிற வெளியிட நிகழ்ச்சிகளுக்கு, பெண் ஆசிரியர்களே மாணவிகளை வழியனுப்ப வேண்டும். தேசிய மாணவர் படை, சாரணர் முகாம் போன்ற நிகழ்ச்சிகளிலும், மாணவிகளுடன் தங்குபவர்கள் பெண்கள் என்பதும் கட்டாயமாக்கப்பட்டுள்ளது.

விடுதிகளில் வெளிநபர்களின் நுழைவு தடை செய்யப்பட்டுள்ளது. துப்புரவு, பராமரிப்பு பணிகளுக்கு அனுமதிக்கப்படும் தொழிலாளர்கள், பெண் விடுதி மேற்பார்வையாளரின் கண்காணிப்பில் மட்டுமே செயல்பட வேண்டும்.

ஒரு மாணவி பாலியல் குற்றம் குறித்து புகார் அளித்தாலோ, அல்லது அதுபற்றி ஏதேனும் தகவல் கிடைத்தாலோ, பள்ளி தலைமை ஆசிரியர் அல்லது பணி செய்த ஆசிரியர் உடனடியாக போலீசாரிடம் புகார் பதிவு செய்ய வேண்டும். அதனுடன், மாவட்ட குழந்தைகள் பாதுகாப்பு அலுவலருக்கும் தகவல் தெரிவிக்க வேண்டியது அவசியம்.

பள்ளிகளில் ‘மாணவர் மனசு’ என்ற பெயரில் தனிப்பட்ட புகார் பெட்டி அமைய வேண்டும். இது கண்காணிப்பு கேமரா இல்லாத இடத்தில் நிறுவப்பட வேண்டும், ஏனெனில் குழந்தைகளின் விவரங்கள் ரகசியமாக இருக்க வேண்டும்.

அத்துடன், பள்ளி வளாகங்கள், வகுப்பறைகள், விளையாட்டு மைதானங்கள், நுழைவும் வெளியேயும் செல்லும் இடங்கள் என அனைத்து முக்கிய பகுதிகளிலும் கண்காணிப்பு கேமராக்கள் பொருத்தப்பட வேண்டும்.

ஆண் ஆசிரியர்கள் மற்றும் ஆண் பணியாளர்களின் அறைக்குள்  மாணவிகள் செல்லக் கூடாது. இது ஒரு கட்டுப்பாட்டாக அமைய வேண்டும். மேலும், பள்ளி நேரம் தவிர மற்ற நேரங்களில் நடைபெறும் சிறப்பு வகுப்புகளுக்கு பெண் பணியாளர்கள் கண்காணிப்பில் இருக்க வேண்டும்.

முழு பெண்கள் பள்ளிகளில் பெண்கள் மட்டுமே பணியாற்ற வேண்டும். கலப்பு பள்ளிகளில் குறைந்தது 50% பணியாளர்கள் பெண்கள் இருக்கவேண்டும் என்ற கட்டுப்பாடும் அமுலாக்கப்படுகிறது.

இவை அனைத்தும் மாணவ, மாணவிகளின் பாதுகாப்பை முதலிடமாகக் கொண்டு உருவாக்கப்பட்ட நடைமுறைகள். இவை மீறப்பட்டால், கல்வித்துறை கடுமையான நடவடிக்கை எடுக்கும் என பள்ளிக்கல்வித்துறை எச்சரிக்கை விடுக்கப்பட்டுள்ளது.

Edited by Mahendran