மின் இணைப்பு எண்ணுடன் ஆதார் எண்ணை இணைக்க அப்டேட் செய்யப்பட்ட புதிய லிங்கை மின்வாரியம் வெளியிட்டுள்ளது.
மின் இணைப்பு எண்ணுடன் ஆதார் எண்ணை இணைப்பதற்கான பணிகள் தற்போது தமிழகத்தில் நடைபெற்று வரும் நிலையில் இதற்காக சிறப்பு முகாம்கள் அமைக்கப்பட்டுள்ளன. டிசம்பர் 31 ஆம் தேதி வரை மின் இணைப்பு எண்ணுடன் ஆதார் எண்ணை இணைக்க கால அவகாசம் இருந்தாலும் பொதுமக்கள் தற்போது ஆதார் எண்ணை மின் இணைப்பு எண்ணுடன் இணைத்து வருகின்றனர்.
மின் இணைப்பு எண்ணுடன் ஆதார் எண் இணைக்க இணையதளத்திலும் வசதி செய்யப்பட்டுள்ளது. அதோடு மின் கட்டண வசூல் மையங்களில் இணைப்பு பணிகள் நடைபெற்று வருகிறது என்று மின்வாரிய அதிகாரிகள் தெரிவித்துள்ளனர். இந்நிலையில் ஆன்லைன் இணைப்புக்காக மின்வாரிய இணையதளத்தை பயனர்கள் அதிக அளவில் பயன்படுத்துவதால் குறிப்பிட்ட இணைய பக்கத்தில் தொழில்நுட்ப கோளாறு ஏற்படுவதாக புகார் எழுந்தது.
இதனைத்தொடர்ந்து மின் இணைப்பு எண்ணுடன் ஆதார் எண்ணை இணைக்க அப்டேட் செய்யப்பட்ட புதிய லிங்கை மின்வாரியம் வெளியிட்டுள்ளது. அதன்படி Bit.ly/linkyouraadhar என்ற இணையதளத்தில் ஆதாரை இணைக்கலாம் என தெரிவிக்கப்பட்டுள்ளது.