தமிழக தலைமைச் செயலாளர் ராம மோகனராவ் வீட்டில் வருமான வரித்துறை அதிரடி சோதனை!

சென்னை அண்ணா நகரில் உள்ள தமிழக தலைமைச் செயலாளர் ராம மோகனராவ் வீட்டில் வருமான வரித்துறையினர் தற்போது அதிரடி சோதனை நடத்தி வருகின்றனர்.

கடந்த சில வாரங்களுக்கு முன்னர் தொழிலதிபர் சேகர் ரெட்டி வீட்டில் வருமான வரித்துறையினர் அதிரடி சோதனை நடத்தினர். இதில் பலகோடி ரூபாய் பணம், தங்கம் உள்ளிட்டவை பறிமுதல் செய்யப்பட்டது. மேலும் சேகர் ரெட்டி வீட்டில் இருந்து பல்வேறு ஆவணங்களும் கைப்பற்றப்பட்டது.

இந்த ஆவணங்களின் அடிப்படையில் வருமான வரித்துறையினர் அடுத்தக்கட்ட நடவடிக்கைகளை எடுத்து வருகின்றனர். சேகர் ரெட்டி, தமிழக தலைமைச்செயலாளர் ராம மோகனராவ் உடன் தொடர்பில் இருந்ததாக தெரிகிறது. இதன் அடிப்படையில் கிடைக்கப்பெற்ற தகவலின் அடிப்படையில் வருமான வரித்துறையினர் சோதனை நடத்தி வருகின்றனர்.

மேலும் சேகர் ரெட்டி ஆளும் கட்சியை சேர்ந்த பலருடனும் நெருக்கத்தில் இருந்ததாக கூறப்படுகிறது. இந்நிலையில் தமிழக தலைமைச்செயலாளர் வீட்டில் நடத்தப்பட்டு வரும் இந்த அதிரடி சோதனை பரபரப்பை ஏற்படுத்தியுள்ளது. அடுத்தடுத்து பல அதிரடி சோதனைகள் இருக்கும் எனவும் எதிர்பார்க்கப்படுகிறது. மேலும் தற்போது நடந்து வரும் இந்த சோதனை எவ்வளவு நாட்கள் நீட்க்கும் என்பது தெரியவில்லை.