முன்னாள் முதல்வர் ஜெயலலிதா நேற்று முன்தினம் அப்பல்லோ மருத்துவமனையில் மரணமடைந்தார். அவரது மறைவு செய்தி அதே மருத்துவமனையில் அனுமதிக்கப்பட்டிருந்த அவரது நண்பர் சோ ராமசாமிக்கு தெரியாது என தகவல் வந்துள்ளது.
மூத்த பத்திரிகையாளரும், துக்ளக் ஆசிரியருமான சோ ராமசாமி இன்று அதிகாலை மரணமடைந்தார். அவருக்கு வயது 82. கடந்த பல மாதங்களாக சோ உடல் நலக்குறைவால் அவதிப்பட்டு வந்தார். பலமுறை மருத்துவமனையில் அனுமதிக்கப்பட்டார்.
இந்நிலையில் சில தினங்களுக்கு முன்னர் மூச்சு திணறல் காரணமாக சென்னை அப்பல்லோ மருத்துவமனையில் அனுமதிக்கப்பட்டார் சோ ராமசாமி. இறுதியில் இன்று அதிகாலை 4.40 மணிக்கு சிகிச்சை பலனின்றி உயிரிழந்தார். மாரடைப்பு காரணமாக சோ ராமசாமி உயிரழந்தார் என்பதை அவரது மருத்துவர் விஜய சங்கர் உறுதிப்படுத்தினார்.
இந்நிலையில் சோ ராமசாமியின் நெருங்கிய நண்பர் முன்னாள் முதல்வர் ஜெயலலிதா அவர் அனுமதிக்கப்பட்டிருந்த அதே அப்பல்லோ மருத்துவமனையில் மரணமடைந்த செய்தி சோ ராமசாமிக்கு தெரியாது என தகவல்கள் வெளியாகி உள்ளது.