பாஜக மாநில தலைவர் தேர்தல்: தமிழிசை மாற்றப்படுவாரா?

பிரதமர் நரேந்திர மோடி தலைமையிலான பாஜக சமீபத்தில் நடைபெற்ற மக்களவை தேர்தலில் மீண்டும் மாபெரும் வெற்றி பெற்று ஆட்சியைப் பிடித்துள்ள நிலையில் தற்போது அடுத்த கட்டமாக கட்சியில் புதிய நிர்வாகிகளை தேர்வு செய்து, கட்சிக்கு புத்துணர்ச்சி ஊட்ட முடிவு செய்யப்பட்டுள்ளது.

முதல் கட்டமாக பாஜகவின் புதிய மாநில தலைவர்கள் தேர்வு செய்யப்பட உள்ளதாகவும் அது மட்டுமின்றி தேசிய செயற்குழு உறுப்பினர்களும் புதிதாக தேர்வு செய்யப்பட்டுள்ளதாகவும் பாஜக தேர்தல் அலுவலர் ராதா மோகன் சிங் அவர்கள் அறிவித்துள்ளார் 

இதனை அடுத்து வரும் டிசம்பர் 1ம் தேதி முதல் 15ம் தேதி வரை நாடு முழுவதும் உள்ள அனைத்து மாநிலங்களிலும் பாஜக மாநில தலைவர் தேர்தல் நடைபெறும் என்று அவர் அறிவித்துள்ளார். இந்த அறிவிப்பால் தமிழகத்திலும் பாஜக தலைவர் தேர்தல் நடைபெறும் என தெரிகிறது 

தற்போது தமிழிசை சௌந்தரராஜன் தமிழக பாஜக தலைவராக இருந்து வரும் நிலையில் மீண்டும் அவர் தலைவர் பதவிக்கு போட்டியிடுவார் என எதிர்பார்க்கப்படுகிறது. அவரை எதிர்த்து எஸ்வி சேகர் உள்பட ஒரு சிலர் தலைவர் பதவிக்கு போட்டியிடலாம் என்று கூறப்படுகிறது 

தமிழக பாஜக கடந்த பல வருடங்களாக நோட்டாவிடம் மட்டுமே போட்டியிட்டு வரும் நிலையில், இக்கட்சி தமிழகத்தில் காலூன்ற வேண்டும் என்றால் புதிய தலைவர் வேண்டும் என பாஜக தொண்டர்கள் கருதுகின்றனர். புதிய தலைவர் வந்தால் பாஜக தமிழகத்தில் வளரும் என்பதை பொறுத்திருந்து பார்ப்போம்