பூரி ரதயாத்திரை.. 500-க்கும் மேற்பட்டோர் காயம்.. ஒடிசா அமைச்சர் விளக்கம்..!

ஒடிசாவின் பூரியில் நடைபெற்ற வருடாந்திர ரத யாத்திரை திருவிழா இந்த ஆண்டு சற்று பரபரப்பானது. பகவான் பலபத்ராவின் தேரை இழுக்க பக்தர்கள் கூட்டம் முண்டியடித்தபோது ஏற்பட்ட நெரிசலில், 500-க்கும் மேற்பட்டோர் காயமடைந்தனர் என அதிர்ச்சி தரும் தகவல்கள் வெளியாகியுள்ளன. பல நூற்றாண்டுகள் பழமையான இந்த திருவிழாவின் மூன்று பெரிய தேர்களில் ஒன்றான தாளத்வஜா தேரை இழுக்கும் சடங்கின்போதே இந்த துரதிர்ஷ்டவசமான சம்பவம் நிகழ்ந்துள்ளது.

ஜகந்நாத் ரத யாத்திரையின்போது பக்தர்கள் மயங்கி விழுந்த சம்பவங்கள் குறித்து ஒடிசா அமைச்சர் முகேஷ் மகாலிங் விளக்கம் அளித்தார். "காலநிலை காரணமாக ஒன்று அல்லது இரண்டு பக்தர்கள் மயங்கி விழுந்தனர். ஆனால், மீட்புக் குழுவினர் விரைந்து செயல்பட்டு அவர்களை மருத்துவமனைக்கு கொண்டு சென்றனர்," என்று அவர் உறுதிப்படுத்தினார்.

மேலும், கோயிலுக்கு அருகிலேயே முதன்மை சுகாதார மையங்கள் அமைக்கப்பட்டுள்ளதாகவும், குடிநீர் மற்றும் குளுக்கோஸ் விநியோகத்திற்கான ஏற்பாடுகள் செய்யப்பட்டுள்ளதாகவும் முகேஷ் மகாலிங் குறிப்பிட்டார். "போதுமான மருத்துவ உதவிகள் கிடைப்பதை நான் தனிப்பட்ட முறையில் உறுதிப்படுத்த இங்கு வந்துள்ளேன். தேவைப்படும் பக்தர்களை நேரில் சென்று பார்க்க மருத்துவமனைக்கும் செல்வேன்," என்றும் அவர் கூறினார்.

கடற்கரையில் அமைந்துள்ள பூரி நகருக்கு லட்சக்கணக்கான பக்தர்களை ஈர்க்கும் இந்த ரத யாத்திரை, பகவான் ஜகந்நாத், அவரது சகோதரர் பகவான் பலபத்ரா, மற்றும் சகோதரி தேவி சுபத்ரா ஆகியோர் ஜகந்நாத் கோயிலில் இருந்து சுமார் 2.5 கிலோமீட்டர் தொலைவில் உள்ள குண்டிச்சா கோயிலுக்குப் பயணம் செய்வதைக் குறிக்கிறது. தெய்வங்கள் ஒரு வாரம் குண்டிச்சா கோயிலில் தங்கிவிட்டு, பின்னர் அதேபோன்ற பிரம்மாண்டமான ஊர்வலத்தில் திரும்பி வருவார்கள்.

பக்தர்கள் கூட்டத்தை நிர்வகிக்கவும், பாதுகாப்பை உறுதிப்படுத்தவும், மத்திய ஆயுதக் காவல் படைகளின் (CAPF) எட்டு பிரிவுகள் உட்பட கிட்டத்தட்ட 10,000 பணியாளர்கள் நகரம் முழுவதும் பாதுகாப்புப் பணிகளில் ஈடுபடுத்தப்பட்டிருந்தனர்.

Edited by Mahendran