ரூபாய் நோட்டில் காந்தி படம் மாற்றமா?

மகாத்மா காந்தியின் படத்தை மாற்றி பிற தலைவர்களின் படத்தை ரூபாய் நோட்டில் வெளியிடுவது குறித்து டெல்லி மேல்-சபையில் கேள்வி எழுப்பப்பட்டது.

டெல்லி மேல்-சபையில் கேள்வி நேரத்தின்போது....

கேள்வி: “மகாத்மா காந்தியின் படத்தை மாற்றவோ, பிற தலைவர்களின் படத்தையும் ரூபாய் நோட்டில் வெளியிடவோ அரசு திட்டம் எதுவும் வைத்துள்ளதா?

பதில்: நிதித்துறை ராஜாங்க மந்திரி அர்ஜூன் ராம்மேக்வால் - “இது தொடர்பாக முந்தைய காங்கிரஸ் கூட்டணி ஆட்சி காலத்தில் ஆராய ஒரு குழு அமைக்கப்பட்டது. அந்தக் குழு, மகாத்மா காந்தியின் படத்தை ரூபாய் நோட்டுகளில் மாற்றத் தேவையில்லை என முடிவு எடுத்து விட்டது”

கேள்வி: “இந்திய அரசியல் சாசன சிற்பி டாக்டர் அம்பேத்கரின் 125-வது பிறந்த நாளையொட்டி அவரது உருவம் பொறித்த ரூபாய் நோட்டு அல்லது நாணயம் வெளியிடப்படுமா?”

பதில்: நிதித்துறை ராஜாங்க மந்திரி அர்ஜூன் ராம்மேக்வால் - “இதையொட்டி அரசாங்கம் ஏற்கனவே புழக்கத்தில் விடாதவகையில் ரூ.125 நாணயம் வெளியிட்டுள்ளது. அம்பேத்கர் உருவம் பொறித்த 10 ரூபாய் நாணயத்தை பிரதமர் நரேந்திர மோடி கடந்த ஆண்டு டிசம்பர் 6-ந் தேதி புழக்கத்துக்காக வெளியிட்டார்”

கேள்வி: ‘பிளாஸ்டிக் ரூபாய் நோட்டு வெளியிடப்படுமா?’

பதில்: நிதி மந்திரி அருண் ஜெட்லி -  “சோதனை அடிப்படையில் பிளாஸ்டிக் ரூபாய் நோட்டுகள் வெளியிடுவதற்காக பிளாஸ்டிக் மூலப்பொருளை டெண்டர் விட்டு கொள்முதல் செய்ய ரிசர்வ் வங்கி தீர்மானித்திருக்கிறது. அதன்படி நடவடிக்கை எடுக்கப்பட்டுள்ளது”.