மானை வேட்டையாடிய வழக்கில் நடிகர் சல்மான் கானுக்கு உச்ச நீதிமன்றம் நோட்டீஸ் அனுப்பியுள்ளது.
பிரபல இந்தி நடிகர் சல்மான்கான் கடந்த 1998 ஆம் ஆண்டு இந்தி படப்பிடிப்புக்காக ராஜஸ்தான் மாநிலம் ஜோத்பூர் சென்றிருந்தார். அப்போது சல்மான்கான் உள்ளிட்ட 6 பேர் அங்குள்ள வனத்தில் மானை வேட்டையாடியதாகக் கூறப்படுகிறது.
இது தொடர்பாக சல்மான் கான் மீது ராஜஸ்தான் நீதிமன்றத்தில் வழக்கு தொடரப்பட்டது. அங்கு மான் வேட்டையாடிய குற்றத்துக்காக அவருக்கு 5 ஆண்டு சிறை தண்டனை விதிக்கப்பட்டது.
இதை எதிர்த்து ராஜஸ்தான் நீதிமன்றத்தில் சல்மான்கான் மேல்முறையீடு செய்தார். அதை தொடர்ந்து 5 ஆண்டு சிறை தண்டனைக்கு தடை விதிக்கப்பட்டது.
இதற்கு எதிர்ப்பு தெரிவித்து உச்ச நீதிமன்றத்தில் ராஜஸ்தான் அரசு மேல் முறையீடு செய்தது. இந்த வழக்கை விசாரித்த நீதிமன்றம் சல்மான் கானுக்கு நோட்டீஸ் அனுப்ப உத்தரவிட்டது.
அதில் 4 வாரத்துக்குள் சல்மான்கான் பதில் அளிக்க வேண்டும் என்று தெரிவிக்கப்பட்டிருப்பது குறிப்பிடத்தக்கது.