சீனாவில் இந்த ஆண்டு துவங்கி முதல் 6 மாதங்களில் மட்டும் 8,48,000 தம்பதிகள் விவாகரத்து கோரி நீதிமன்றங்களில் மனு தாக்கல் செய்து இருக்கிறார்கள். இது கடந்த ஆண்டைக் காட்டிலும் 10 விழுக்காடு அதிகமாகும்.
விவாகரத்து அதிகமாக இருக்கும் பகுதிகளில் ஷின்ஜியாங் உய்க்குர் மாநிலம் தான் முதலிடத்தில் உள்ளது. பீஜிங் நகரம் விவாகரத்து அதிகம் உள்ள நகரங்களில் 8-வது இடத்தில் உள்ளது. ஷாங்காய் நகரம் 6-வது இடத்தில் உள்ளது.
2009 ஆம் ஆண்டு மட்டும் 24,70,000 தம்பதிகள ் விவாகரத்து பெற்று உள்ளனர். 2005-ம் ஆண்டு முதல் 2009-ம் ஆண்டு வரை ஆண்டு தோறும் 7.6 விழுக்காடு தம்பதிகள் என்ற விகிதத்தில் விவாகரத்து செய்பவர்களின் எண்ணிக்கை அதிகரித்து வருகிறது.
இதனால் சீன அரசு தனது நாட்டு கலாச்சார சீரழிவு குறித்து கவலைக் கொண்டுள்ளது. மக்கள் தொகையைக் குறைக்கும் முயற்சியில் ஈடுபட்டு வரும் சீன அரசு, எப்படி விவாகரத்துக்களை குறைக்க நடவடிக்கை எடுப்பது என்று தெரியாமல் குழம்பி வருகிறது.
ஒரு ஆண்டில் இத்தனை தம்பதிகள் விவாகரத்துக் கோருவதற்கான காரணங்களை ஆய்வு செய்து வருகிறது. அதன்படி, கணவன் ஒரு இடத்திலும் மனைவி ஒரு இடத்திலும் வேலை செய்வது தான் முக்கியப் பிரச்சினையாக உள்ளது என்று கண்டுபிடிக்கப்பட்டுள்ளது.
பொருளாதார சூழ்நிலையைக் கருத்தில் கொண்டு கணவன், மனைவி இருவரும் வேலைக்குச் செல்கின்றனர். பணி மாறுதல்கள், பதவி உயர்வு போன்றவற்றால ் இருவரும் தனித்தனியாக வேலை பார்ப்பதால் குடும்ப உறவுகளில் நிலைத்தன்மை அற்றுவிடுகிறது. வேலை பார்க்கும் இடங்களில் சக பணியாளர்களுடன் ஏற்படும் ஈடுபாடு திருமண உறவை முறிக்கும் அளவிற்கு சென்று விடுகிறது. இதுபோன்று பல்வேறு காரணங்களால், சீனாவில் திருமண உறவுகள் சீரழிந்து, விவாகரத்து வரை செல்கிறது.