மருத்துவ படிப்புக்கான கலந்தாய்வு ஜூலை 6ஆம் தேதி தொடங்குகிறது என்று சுகாதாரத்துறை அமைச்சர் எம்.ஆர்.பன்னீர் செல்வம் கூறினார்.
சென்னையில் இன்று செய்தியாளர்களுக்கு பேட்டி அளித்த அவர், தமிழ்நாட்டில் 15 அரசு மருத்துவ கல்லூரிகளும், 4 சுயநிதி மருத்துவ கல்லூரிகளும் உள்ளன. அரசு கல்லூரிகளில் 1,745 இடங்களில் அகில இந்திய ஒதுக்கீடு 262 இடங்கள் போக 1483 எம்.பி.பி.எஸ். இடங்கள் மாநில அரசின் ஒதுக்கீடாகும்.
தனியார் மருத்துவ கல்லூரிகளில் உள்ள 410 இடங்களில் அகில இந்திய ஒதுக்கீடு மற்றும் நிர்வாக ஒதுக்கீடு 159 இடங்களாகும். மீதம் உள்ள 251 சீட்டுகள் மாநில அரசின் ஒதுக்கீடு ஆகும்.
சென்னையில் உள்ள ஒரே ஒரு அரசு பல் மருத்துவ கல்லூரியில் 85 இடங்களும், 17 சுயநிதி பல் மருத்துவ கல்லூரிகளில் 847 இடங்களும் உள்ளன.
எம்.பி.பி.எஸ்., பி.டி.எஸ். மருத்துவ படிப்புகளில் சேர்வதற்கான விண்ணப்பம் வருகிற 3ஆம் தேதி வினியோகிக்கப்படும். விண்ணப்பம் பெறுவதற்கான கடைசி நாள் 17ஆம் தேதி ஆகும். அதே தினமே விண்ணப்பிக்க கடைசி தினமாகும்.
ரேண்டம் எண் 19ஆம் தேதி வழங்கப்படும். ரேங்க் பட்டியலில் 28ஆம் தேதி வெளியிடப்படும். முதல் கட்ட கலந்தாய்வு ஜூலை 6ஆம் தேதி தொடங்கி 17ஆம் தேதி வரை நடைபெறும். உடல் ஊனமுற்றோர், விளையாட்டு வீரர்கள், சுதந்திர போராட்டத்தில் ஈடுபட்டவர்களின் வாரிசுகளுக்காக சிறப்பு பிரிவு கலந்தாய்வு 6ஆம் தேதி நடைபெறும்.
இரண்டாம் கட்ட கலந்தாய்வு ஆகஸ்ட் 25ஆம் தேதி நடக்கிறது. மாணவர்கள் சேர்வதற்கான கடைசி நாள் செப்டம்பர் 30ஆம் தேதி ஆகும்.
திருவாரூர், விழுப்புரம் மருத்துவ கல்லூரிகளில் அகில இந்திய மருத்துவ கவுன்சில் ஆய்வு செய்து வருகிறது. இந்த ஆண்டு அந்த கல்லூரிகளில் மாணவர் சேர்க்கை நடை பெற வாய்ப்பு உள்ளது. தர்மபுரி அரசு மருத்துவ கல்லூரியில் இந்த ஆண்டு மாணவர்களை சேர்ப்பதற்கு அகில இந்திய மருத்துவ கவுன்சில் ஆய்வு நடத்தியது. இது திருப்திகரமாக இருந்ததாக தெரிவிக்கப்பட்டுள்ளது.
தனியார் மருத்துவ கல்லூரி கட்டணம், கலந்தாய்வு தொடங்குவதற்கு முன்னதாக அறிவிக்கப்படும். தனியார் மருத்துவ கல்லூரிகளில் கூடுதல் கட்டணம் வசூலிப்பது குறித்து புகார் தெரிவித்தால் உடனடியாக நடவடிக்கை எடுக்கப்படும். இதற்காக ஊழல் தடுப்பு கண்காணிப்பு குழு அமைக்கப்பட்டுள்ளது. எனது செல்போனுக்கோ (94433 71590) மற்றும் மருத்துவ கல்லூரி இயக்குனர் செல்போனுக்கோ (94432 57406) தொடர்பு கொண்டு புகார் தெரிவிக்கலாம்.
போலியான நர்சரி கல்லூரி தொடங்கப்பட்டு மாணவர்கள் பாதிக்கப்பட்டு உள்ளனர். அப்படிப்பட்ட கல்லூரிகளை கண்டறிந்து மூட நடவடிக்கை எடுத்துள்ளோம். இதுவரை 16 போலி நர்சிங் கல்லூரிகள் சேலம், நாமக்கல் மாவட்டத்தில் மூடப்பட்டுள்ளன. அனுமதி பெற்ற நர்சிங் கல்லூரி பட்டியலில் விவரங்கள் ஓரிரு நாளில் வெப்சைட்டில் வெளியிடப்படும். போலியான கல்லூரியில் சேர்ந்து யாரும் ஏமாற வேண்டாம்’’என்று அமைச்சர் கேட்டுக் கொண்டார்.
