மத நல்லிணக்கத்திற்கு வழிகோலும் தீபாவளி குதூகலம்!
, செவ்வாய், 6 நவம்பர் 2007 (16:53 IST)
இந்துக்களின் முக்கியப் பண்டிகைகளில் தீபாவளி குறிப்பிடத்தக்க இடத்தை பெற்றுள்ளது. ஆண்டுதோறும் கொண்டாடப்படும் தீபாவளிப் பண்டிகையை முன்னிட்டு அரசு மற்றும் தனியார் நிறுவனங்கள் தங்களின் ஊழியர்கள் மற்றும் தொழிலாளர்களுக்கு ஊக்கத் தொகையை வழங்கி மகிழ்ச்சியைப் பரிமாறிக் கொள்கின்றன.திருமணம் முடிந்த முதல் ஆண்டில் வரும் தீபாவளியை `தலை தீபாவளியாக' புதுமணத் தம்பதியர் கொண்டாடி மகிழ்கிறார்கள். அந்த அளவுக்கு இந்துக்கள் மத்தியில் தீபாவளிப் பண்டிகை முக்கியத்துவம் பெற்றுள்ளது.குழந்தைகளைப் பொறுத்தவரை பட்டாசுகள், புத்தாடை, இனிப்புகள் என்று அவர்களின் மகிழ்ச்சிக்கு அளவே இல்லை எனலாம். மேலும் அக்கம்பக்கத்தில் உள்ள பிற மதத்தைச் சேர்ந்த நண்பர்களுக்கும் குழந்தைகள் தங்கள் வீட்டிலிருந்து இனிப்புகளை வழங்கி மகிழ்ச்சியை பரிமாறிக் கொள்வர். அந்த வகையில் மதநல்லிணக்கத்திற்கும் தீபாவளிப் பண்டிகை காரணமாகிறது என்றால் அது மிகையில்லை.தீபாவளி பிறந்த வரலாறு!
தீபாவளி - தீப+ஆவளி. ஆவளி என்றால் வரிசை என்று பொருள். தீபங்களை வரிசையாக ஏற்றிவைத்து கொண்டாடுவதுதான் தீபாவளி.தீபாவளி பிறந்தது இன்றில் இருந்து 2600 ஆண்டுகளுக்கு முற்பட்டது என்று சமண சமய வரலாறு கூறுகிறது. சமண சமயத்தின் 24வது குருவான (திருத்தங்கரர்) ஸ்ரீமகாவீரா உடலை நீத்த நாள் முதல் தீபாவளி கொண்டாடப்பட்டு வருவதாக அந்த வரலாறு கூறுகிறது.
கி.மு. 599ல் பிறந்த மகாவீரர் தனது 14வது வயதில் வளமான வாழ்வைத் துறந்து ஆன்மீக ஞானம் தேடி இறையருள் பெற்றவராய் பல தேசங்களுக்குப் பயணம் செய்து அகிம்சை, சத்தியம், மனிதாபிமானம், அன்பு, பரிவு, கருணை ஆகியவற்றை 8 கொள்கைகளாக போதித்தார்.
இறை நிலையை எட்டி (முக்தி பெற்று) பல்வேறு அரசவைகளுக்குச் சென்று பேருண்மையை போதித்து வந்த மகாவீரர் கி.மு. 527ல் தன் உடலை துறந்தார்.
அவர் உடலைத் துறந்த நாளையே தீபங்களை வரிசையாக ஏற்றி வைத்து அறியாமை இருள் அகன்று ஒளி பிறந்த நாளாக தீபாவளி என்று கொண்டாடப்பட்டதாகவும் அதுவே இன்று வரை பாரம்பரியமாக கொண்டாடப்பட்டு வருவதாகவும் சமண வரலாறு கூறுகிறது.
எதனால் தீபாவளி கொண்டாடப்படுகிறது!
அனைத்து மதத்தினரையும் ஈர்க்கும் ஒரே பண்டிகை தீபாவளிதான். இந்த பண்டிகை அக்பர் காலத்திலேயே இந்து மதத்தினர் கொண்டாடி இருக்கிறார்கள். அப்போது அவர்கள் இந்த பண்டிகையை கொண்டாட எந்தவித தடையும் கிடையாது. அந்த பண்டிகையை மகிழ்ச்சியோடு கொண்டாடி இருக்கிறார்கள்.தீபாவளி வந்தாலே குழந்தைகளுக்கு கொண்டாட்டம்தான். பட்டாசு வெடித்து ஆனந்த குத்தாடும் அவர்களின் மகிழ்ச்சிக்கு எல்லையே கிடையாது. பெரியவர்கள் வரை பட்டாசு வெடித்து மகிழ்ச்சி அடைவார்கள்.
தீபாவளி பண்டிகை ஏன் கொண்டாடப்படுகிறது எதற்காக கொண்டாடப்படுகிறது என்பதை பார்ப்போம்!நரகாசுரன் என்ற அரக்கன் ஒருவன் இருந்தான். அவனுக்கு இந்த மூவுலகமும் தன் கட்டுப்பாட்டில் கொண்டு வந்து தன் விருப்பத்திற்கு அனுபவிக்க வேண்டும் என்ற பேராசை இருந்தது. தேவர்கள் கூட தன் காலடியில் கிடக்க வேண்டும் என்ற நப்பாசை இருந்தது.இந்த ஆசைகளை நிறைவேற்ற பிரம்மனை நோக்கி கடும் தவம் இருந்தான் நரகாசுரன்.இதனை பார்த்த பிரம்மன், தனக்காக தவம் இருந்த நரகாசுரனுக்கு அவன் கேட்கும் வரங்களை அள்ளி அள்ளி கொடுத்தார். ஒரு கெட்டவனுக்கு பதவி கிடைத்தால் எப்படியெல்லாம் பயன்படுத்துவானோ அப்படியெல்லாம் பயன்படுத்திக் கொண்டான் நரகாசுரன்.எல்லோருக்கும் துன்பம் விளைவித்து வந்த நரகாசுரன், தேவர்களையும் முனிவர்களையும் அவன் கொடுமைப்படுத்தினான். அதுமட்டுன்றி தனக்கு வரம் கொடுத்த பிரம்மனை எதிர்த்தே போர் தொடுத்தான் நரகாசுரன்.வரத்தை கொடுத்து விட்டு நரக வேதனைகளை அனுபவிக்க வேண்டி இருக்கிறதே என்று புலம்பினார் பிரம்மன். காக்கும் கடவுளான கிருஷ்ண பகவானிடம் தன் குறைகளை கூறி முறையிட்டார்.இதனால் கிருஷ்ண பகவான் நரகாசுரனை அணுகி, தவம் செய்து பெற்ற வரத்தை தவறான வழியில் செயல்படுத்துவது நியாயம் அல்ல என்று முறையாக சொல்லி பார்த்தார்.ஆனால் நரகாசுரன் கேட்பதாக இல்லை. தன் விருப்பம் போல் மக்களை கொடுமைப்படுத்தினான். இதனால் கோபம் அடைந்த கிருஷ்ண பகவான், நரகாசுரனை போருக்கு அழைத்து தம் சக்கராயுதத்தால் அவனின் உடலை இரண்டாக பிளந்தார்.இறக்கும் நிலையில் இருந்த நரகாசுரன், கிருஷ்ணனின் காலை பிடித்து, பகவானே என்னுடைய சாவு கெட்டவர்களுக்கு ஒரு பாடமாக இருக்க வேண்டும். நான் செய்த பாவங்களை மன்னித்து விடுங்கள் என்று கெஞ்சினான்.இறக்கும் நிலையில் உள்ள எனக்கு ஒரு ஆசை. அதை இப்போது தெரிவிக்கிறேன் என்று சொன்ன நரகாசுரன், கொடியவனாக நான் இறக்கும் இந்நாளை மக்கள் அனைவரும் அல்லல் நீங்கிய நன்நாளாக மங்களகரமான நாளாக கொண்டாடி மகிழ வேண்டும் என்று வேண்டினான்.
கிருஷ்ண பகவானும் அவ்வாறே அவனுக்கு அருளினார். இதனால் தான் நரகாசுரன் இறந்த நாளைத்தான் இந்துக்கள் தீபாவளியாக கொண்டாடி வருகின்றனர் என்று ஜதீகம் கூறுகிறது.இந்த நன்நாளில் அதிகாலையில் எழுந்து எண்ணெய் தேய்த்து குளித்து, புத்தாடை அணிந்து பல வகை பண்டங்கள் செய்து பட்டாசு வெடித்து கொண்டாடி வருகிறோம்.
தீபாவளி இங்கு மட்டும் கொண்டாடப்படுவதில்லை. உலகம் முழுவதும் இந்த பண்டிகை கொண்டாடப்பட்டு வருகிறது.
தீபாவளி என்றால் தீபங்களின் வரிசை என்று பொருள் உண்டு. இந்தநாளில் தீபங்களை வரிசையாக வைத்து மகிழ்ந்து கொண்டாடுவார்கள். ராமபிரான் இலங்கை சென்று ராவணனோடு கடும் போர் புரிந்து, தனது இல்லாளான (மனைவி) சீதா பிராட்டியாரை மீட்டுக் கொண்டு அயோத்திக்கு திரும்பி வந்தார்.தன் வனவாசம் முடிந்து நாட்டை ஆள வரும் வெற்றி வீரர் ராமரை வரவேற்க மக்கள் மிகவும் மகிழ்ச்சியாக தீபங்களை ஏற்றி கொண்டாடினார்கள்.அதனால்தான் தீபாவளி அன்று திருவிளக்குகளை வரிசையாக ஏற்றி வைக்கும் வழக்கம் ஏற்பட்டதாக கூறுவார்கள்.
தீபாவளியை நரக சதுர்தசி என்றும் அழைப்பார்கள். ஐப்பசி மாதத்தில் சூரியன் துலா ராசியில் இருப்பார். அப்போது தேய் பிறையான (கிருஷ்ண பட்சம்) 14ஆம் நாளில் கொண்டாடப்படும்.
திரியோதசி இரவு சதுர்தசி காலை கொண்டாடப் பெறுவதினால் இதற்கு நரக சதுர்த்தசி என்று வழங்கப்படுகிறது.தீபாவளி சிறப்பிதழ் முகப்பு!
