குளம், ஏரிகளையும் விட்டு வைக்கவில்லை!
, செவ்வாய், 4 ஜனவரி 2011 (16:16 IST)
தென்காசி அருகே ஏரிகளை ஆக்கிரமித்து வீடுகள் கட்டிவருவதாக கூறி 10 க்கும் மேற்பட்ட கிராமங்களை சேர்ந்தவர்கள் மாவட்ட ஆட்சித் தலைவரிடம் புகார் தெரிவித்துள்ளனர். இவர்கள் அனைவரும் திருமலாபுரம், சுற்று வட்டாரப் கிராமங்களை சேர்ந்தவர்கள் ஆவர். தங்களின் நீராதாரமாக விளங்கி வரும் திருப்பன்குளத்தை சிலர் வீட்டு மனைகளாக மாற்றி வருகின்றனர் என்று புகாரில் தெரிவித்துள்ளனர்.பழைய குற்றால அருவியில் இருந்து நீர் வந்து சேரும் இந்த ஏரியில் நீர் இல்லாத காலங்களில் பயிர் செய்து கொள்ள அனுமதி அளிக்கப்பட்டுள்ளது. இதற்காக பட்டா பெற்ற சிலர் அதிகாரிகள் சிலரின் துணையுடன் அந்த இடத்தை தற்போது வீட்டு மனைகளாக மாற்றி வருகின்றனர்.இந்நிலை தொடர்ந்தால் 10க்கும் மேற்பட்ட கிராம மக்களுக்கு குடிநீரே கிடைக்காது நிலை ஏற்படும் சூழல் உருவாகியுள்ளது. திருப்பன்குளம் ஆக்கிரமிக்கப்பட்டால் 100 க்கும் மேற்பட்ட ஏக்கரில் நடைபெற்று வரும் விவசாயம் அடியோடு அழிந்து விடும் என்று பொதுமக்கள் குமுறுகின்றனர்.
திருப்பன்குளம் 60 ஏக்கர் பாசனப் பகுதிக்கு உள்பட்டது. இந்த குளம் குற்றால அருவியில் இருந்து வரும் நீர்நிலைகள் வைத்துதான் பெருகி கொண்டிருக்கிறது. இந்த குளம் பெருகினால் 5 கிலோ மீட்டரில் உள்ள கிராமங்களில் நிலத்தடி நீர் அதிகரிக்கும். இதனால் விளைநிலங்களும் நன்றாக இருக்கும். குடிநீர் பஞ்சமும் நீக்க வாய்ப்பு இருக்கிறது. ஆனால் அந்த இடத்தை சிலர் தனியாக பட்டா போட்டு வீட்டு மனைகளாக பிரித்து விற்பனை செய்ய முயற்சிக்கிறார்கள்.
''சமீப காலமாக அதிகாரிகள் பணத்தை வாங்கிக் கொண்டு பாலம், மடைகள் கட்டியதால் எங்களுக்கு தண்ணீரே வரவில்லை. இது தொடர்பாக முதலமைச்சர், பொதுப்பணித்துறை உயர் அதிகாரிகளுக்கும் புகார் அனுப்பப்பட்டிருப்பதாகவும், இது குறித்து உரிய நடவடிக்கை எடுக்கபடாவிட்டால் போராட்டத்தை தீவிரப்படுத்துவோம்'' என்று கிராமமக்கள் கூறுகின்றனர்.
தென்காசியில் மட்டும் இந்த நிலை இல்லை. தமிழகம் முழுவதும் இதே நிலைதான் நீடித்து வருகிறது. பணம் படைத்த செல்வந்தவர்கள் அரசு அதிகாரிகளின் துணையுடன் இப்படி ஏரி, குளங்களை வீட்டு மனைகளான மாற்றி வருகின்றன.
தூத்துக்குடி மாவட்டம் ஆத்தூர், ஆறுமுகநேரி, காயல்பட்டினம், திருச்செந்தூர், புன்னக்காயல், குலசேகரன் பட்டிணம், பிச்சைவிளை, ஆலந்தலை உள்ளிட்ட பல்வேறு இடங்களில் குளம், ஏரி பாசனம் ஒரு காலத்தில் விவசாயம் கொடி கட்டிப் பறந்தது. அந்த வழியாக பேருந்துகளில் செல்லும் போது விவசாயிகள் நெற்கதிர்களை அறுத்து சாலைகளில் கதிர் அடித்துக் கொண்டிருப்பதை பார்க்க முடிந்தது.தற்போது அங்கிருந்த குளம், ஏரிகளை காண முடியவில்லை. இந்த இடங்கள் எல்லாம் வீட்டு மனைகளாக மாறிவிட்டன. குளம், ஏரிகள் எல்லாம் காணாமல் போய்விட்டன. குளம், ஏரி, விளை நிலங்கள் எல்லாம் எப்படி வீட்டு மனைகளாக மாறியது என்று கேட்டால் அவர்கள் மனவேதனையுடன் கூறுகின்றனர்.
''ஒரு காலத்தில் எங்கள் பகுதி விவசாயத்துக்கு பெயர் பெற்ற இடம். தண்ணீர் வரத்து அதிகமாக இருந்த அந்த காலத்தில் விவசாயம் எப்போதும் நடைபெற்று கொண்டிருக்கும். நாங்களும் விவசாயத்தை நம்பி வாழ்க்கையை கழித்து வந்தோம். இப்படி வாழ்ந்த நாங்கள் போதுமான தண்ணீர் இல்லாததாலும், வறட்சி காரணமாகவும் விளைநிலங்களை விற்று விட்டோம். தற்போது அந்த விளைநிலங்கள் எல்லாம் வீட்டு மனைகளாக மாறிவிட்டன'' என்று வேதனை தெரிவிக்கின்றனர் திருச்செந்தூர் பகுதி மக்கள்.
கோவையில் சின்னாடப்பட்டி, கவுண்டம்பாளையம், துடியலூர், அஞ்சுகம்நகர் உள்ளிட்ட பல்வேறு பகுதிகளில் வாழை, சோளம் உள்ளிட்ட பயிர்கள் நடவு செய்யப்பட்டு வந்தன. கடந்த சில மாதத்திற்கு முன்னர் இவைகள் விளைநிலங்களாக காட்சி அளித்தன. தற்போது வீட்டு மனைகளாக காட்சி அளிக்கின்றன.
இப்படி விளைநிலங்களை வீட்டு மனைகளாக மாற்றி வரும் சூழல் தற்போது தமிழகத்தில் பெருகிறது வருகிறது. குளம், ஏரிகளை விட்டு வைக்காதவர்களால் வரும் காலங்களில் தமிழகத்தில் விவசாயம் அழிவைத்தான் சந்திக்க நேரிடும். இதை தடுப்பது, காப்பது யாரோ?
