நடைபெற்று வரும் டி 20 உலகக்கோப்பையின் பயிற்சி ஆட்டத்தில் வெஸ்ட் இண்டீஸ் அணியை 45 ரன்கள் வித்தியாசத்தில் இந்திய அணி தோற்கடித்தது.
டி 20 உலகக்கோப்பை பயிற்சி ஆட்டத்தில் இந்தியா - வெஸ்ட் இண்டீஸ் அணிகள் மோதின. இதில் முதலில் பேட்டிங் செய்த இந்திய அணி 20 ஓவர்கள் முடிவில் 185 ரன்கள் குவித்தது.
அதிகப்பட்சமாக ரோஹித் சர்மா 57 பந்துகளில் [9 பவுண்டரிகள், 7 சிக்ஸர்கள்] 98 ரன்கள் குவித்தார். யுவராஜ் சிங் 20 பந்துகளில் [3 பவுண்டரிகள், 1 சிக்ஸர்] 31 ரன்கள் எடுத்தார். வெஸ்ட் இண்டீஸ் தரப்பில் ஜெரோம் டெய்லர், சுலைமான் பென் தலா 2 விக்கெட்டுகளை கைப்பற்றினர்.
பின்னர் ஆடிய வெஸ்ட் இண்டீஸ் அணி 19.2 ஓவர்களில் அனைத்து விக்கெட்டுகளையும் இழந்து 140 மட்டுமே எடுத்தது. இதனால் இந்திய் அணி 45 ரன்கள் வித்தியாசத்தில் வெற்றி பெற்றது. கிறிஸ் கெய்ல் அடித்த 20 ரன்கள் [3 பவுண்டரிகள், 1 சிக்ஸர்] அந்த அணியின் அதிகப்பட்சமாகும்.
பெரிய அளவிலான ரன்னை சேஸிங் செய்கையில் வலுவான பாட்னர்ஷிப் அமைவது அவசியம். ஆனால், வெஸ்ட் இண்டீஸ் தரப்பில் அது அமையவில்லை. இந்திய தரப்பில் மொஹமது சமி, பவன் நெகி, ஜடேஜா, பாண்டியா ஆகியோர் தலா 2 விக்கெட்டுகளை வீழ்த்தினர்.