அயர்லாந்து, ஆப்கான், ஸ்காட்லாந்து, யு.ஏ.இ. நெதர்லாந்து என்று நிறைய அணிகள் ஐசிசி இன்டர் காண்டினெண்டல் கோப்பை என்ற தொடரில் விளையாடி வருவது நாம் அறிந்ததே.
இந்த நிலையில் இந்த கோப்பையை வெல்லும் சாதாரண அணி, ஐசிசி டெஸ்ட் தர வரிசையில் கடைசியாக உள்ள அணியுடன் 2 டெஸ்ட் போட்டிகளில் தங்கள் சொந்த நாட்டிலும் மேலும் 2 டெஸ்ட் போட்டிகளை எதிரணியினரின் நாட்டிலும் விளையாடும். இதற்கு ஐசிசி டெஸ்ட் சாலஞ்ச் என்று பெயரிடப்பட்டுள்ளது.
இதுபோன்ற முதல் டெஸ்ட் 2018ஆம் ஆண்டு நடைபெறும் என்று அறிவிக்கப்பட்டுள்ளது.
இன்டர் காண்டினென்டல் கோப்பை கிரிக்கெட் 2 ஆண்டுகள் நடைபெறும். இதில் வெற்றி பெறும் அசோசியேட் அணி, டிசம்பர் 31, 2017-இல் ஐசிசி டெஸ்ட் தரவரிசையில் 10ஆம் நிலையில் உள்ள அணியுடன் தன் சொந்த நாட்டிலும், அவர்களது நாட்டிலும் இரண்டு டெஸ்ட் போட்டிகளில் விளையாடும் வாய்ப்பினைப்பெறும்.
இந்த இன்டர் காண்டினென்டல் கோப்பை 2004ஆம் ஆண்டு அறிமுகம் செய்யப்பட்டது. அயர்லாந்து அணி இதில் 4 முறை கோப்பையை வென்றுள்ளது. எனவே டெஸ்ட் அந்தஸ்து பெறும் அணி அயர்லாந்தாகவே இருக்கலாம் என்று எதிர்பார்க்கப்படுகிறது.
ஐசிசி கூட்டத்தில் எடுக்கப்பட்ட மேலும் சில முடிவுகள் வருமாறு:
2016ஆம் ஆண்டு இந்தியாவில் நடைபெறும் இருபது ஓவர் உலகக் கோப்பை கிரிக்கெட் போட்டி இப்போது வங்கதேசத்தில் முடிந்த உலகக் கோப்பை வடிவத்திலேயே நடைபெறும்.
ஏப்ரல் 30, 2014-இல் தரவரிசையில் முதல் 8 இடங்களில் இருக்கும் அணிகள் 2016 T20 உலகக் கோப்பை கிரிக்கெட்டிற்கு தானாகவே தகுதிபெறும். அசோசியேட் அணிகளுக்கு இப்போது போலவே தகுதிச் சுற்றுப்போட்டிகள் நடைபெறும்.
தகுதிச் சுற்றுப்போட்டிகள் 2015 ஜூலை 9ஆம் தேதி முதல் ஆகஸ்ட் 2ஆம் தேதி வரை நடைபெறும்.
