இந்தியாவில் முதல் தேர்தலில் இருந்தே, திண்டுக்கல் மக்களவைத் தொகுதி மாறாமல் இன்றும் இருந்து வருகிறது.
2008ம் ஆண்டு நடைபெற்ற தொகுதி மறுசீரமைப்புக்கு பின்னர், திண்டுக்கல் மக்களவைத் தொகுதியில், பழனி, ஒட்டன்சத்திரம், ஆத்தூர், நிலக்கோட்டை, நத்தம், திண்டுக்கல் ஆகிய சட்டமன்ற தொகுதிகள் உள்ளன.
தொகுதி மறுசீரமைப்புக்கு முன் திருமங்கலம், உசிலம்பட்டி, நிலக்கோட்டை (தனி), சோழவந்தான், திண்டுக்கல், ஆத்தூர் ஆகிய சட்டமன்ற தொகுதிகள் திண்டுக்கல் மக்களவைத் தொகுதியில் இருந்தன.
தற்போதைய மக்களவை உறுப்பினராக அதிமுக-வின் எம். உதய குமார் உள்ளார்.
சபரிமலை ஐயப்பன் கோயில் சர்ச்சை களமாகியுள்ள பழனி
சபரிமலை ஐயப்பன் கோயிலில் எல்லா வயது பெண்களும் தரிசனம் செய்யலாம் என்ற இந்திய உச்ச நீதிமன்றம் தீர்ப்புக்கு பின்னர் தோன்றியுள்ள பிரச்சனைகளை அடுத்து கவனம் பெற்றுள்ள இடமாக மாறியுள்ளது பழனி.
சபரிமலைக்கு செல்லும் பெண்களை பழனியில் தடுத்து நிறுத்துவதும், அங்கிருந்தே காவல்துறையினர் பெண்களுக்கு பாதுகாப்பு அளித்து அழைத்து செல்லுவதும் வழக்கமாகியுள்ளதால், பழனி இந்த மக்களவை தேர்தலில் உற்றுநோக்கப்படும் இடமாக மாறியுள்ளது.
திண்டுக்கல் மாவட்டத்திலுள்ள பழனியில் புகழ் பெற்ற முருகன் மலைக்கோவில் அமைந்துள்ளது. இங்கு, 2013ம் ஆண்டு சங்ககால ஓவியங்கள் கண்டுபிடிக்கப்பட்டன.
இந்த சட்டமன்ற தொகுதியில் இந்துக்களும், முஸ்லிம்களும் வாழ்ந்து வருகின்றனர். 9 இந்து வழிபாட்டுத்தலங்களும், 7 இஸ்லாமிய வழிபாட்டுத்தலங்களும் உடைய இந்த தொகுதியில் கொடைக்கானல் உள்பட முக்கிய சுற்றுலா தளங்களான ஆறுகள், அணைகள் காணப்படுகின்றன.
மலர்கள் அதிகம் விளைகின்ற பகுதியாக இந்த மக்களவை தொகுதியில் உள்ள நிலக்கோட்டை சட்டமன்ற தொகுதி விளங்குகிறது. பெரும்பாலும் விவசாயத்தையே நம்பியுள்ள இந்த மக்கள் பூ பறித்தல், பூ தொடுத்தல் பூ வியாபாரம் போன்ற தொழில்களில் பரவலாக ஈடுபடுகின்றனர். தமிழகத்தில் மிகப் பெரிய மலர் சந்தைகளில் ஒன்று நிலக்கோட்டையில் உள்ளது.
அதிக மலர்கள் விளைவதால் இங்கு சென்ட் தொழிற்சாலை கொண்டு வர வேண்டுமென்பதும், வாழை ஆராய்ச்சி நிலையம் அமைக்க வேண்டுமென்பதும் மக்களின் நெடுங்கால கோரிக்கையாக உள்ளது.
நிலக்கோட்டையில் நிலவும் தண்ணீர் பிரச்சனைக்கு தீர்வு காண காவிரி கூட்டுக் குடிநீர் திட்டம் போன்ற ஒரு சில முயற்சிகள் எடுக்கப்பட்டுள்ளன. ஆனால், இந்த பிரச்சனையை முற்றிலும் தீர்ப்பதற்கான நடவடிக்கை எடுக்கப்படவில்லை என்கிற குற்றச்சாட்டு மக்களால் வைக்கப்பட்டு வருகிறது.
திண்டுக்கல் மக்களவைத் தேர்தலில் வெற்றி பெற்றவர்கள்
ஆண்டுவெற்றி பெற்றவர்கட்சிஇரண்டாம் இடம்கட்சி
1951அம்மு சுவாமிநாதன்இந்திய தேசிய காங்கிரஸ்கிருஷ்ணசாமிஇந்திய கம்யூனிஸ்ட் கட்சி
1957எம். குலாம் முகைதீன்இந்திய தேசிய காங்கிரஸ்எஸ். சி. பால கிருஷ்ணாஇந்திய தேசிய காங்கிரஸ்
1962டி. எஸ். சுந்தரம் ராமசந்திரன்இந்திய தேசிய காங்கிரஸ்எம். எஸ். அப்துல் காதர்திராவிட முன்னேற்ற கழகம்
1967என். அன்பழகன்திராவிட முன்னேற்ற கழகம்டி. எஸ். எஸ். ராமமசந்திரன்இந்திய தேசிய காங்கிரஸ்
1971எம். ராஜாங்கம்திராவிட முன்னேற்ற கழகம்கே. சீமசாமிசுதந்திர கட்சி
1973கே. மாயத்தேவர்அண்ணா திராவிட கழகம் (இடைத்தேர்தல்)தகவல் இல்லைதகவல் இல்லை
1977கே. மாயத்தேவர்அண்ணா திராவிட கழகம்ஏ. பாலசுப்பிரமணியன்மார்க்சிஸ்ட் கம்யூனிஸ்ட் கட்சி
1980கே. மாயத்தேவர்திராவிட முன்னேற்ற கழகம்வி. ராஜன் செல்லப்பாஅண்ணா திராவிட கழகம்
1984கே. ஆர். நடராஜன்அண்ணா திராவிட கழகம்கே. மாயத்தேவர்திராவிட முன்னேற்ற கழகம்
1989சி. ஸ்ரீனிவாசன்அண்ணா திராவிட கழகம்என். வரதராஜன்மார்க்சிஸ்ட் கம்யூனிஸ்ட் கட்சி
1991சி. ஸ்ரீனிவாசன்அண்ணா திராவிட கழகம்கே. மாயத்தேவர்திராவிட முன்னேற்ற கழகம்
1996என். எஸ். வி. சித்தன்தமிழ் மாநில காங்கிரஸ் (மூப்பனார்)சி. ஸ்ரீனிவாசன்அண்ணா திராவிட முன்னேற்ற கழகம்
1998சி. ஸ்ரீனிவாசன்அண்ணா திராவிட முன்னேற்ற கழகம்என். எஸ். வி. சித்தன்தமிழ் மாநில காங்கிரஸ் (மூப்பனார்)
1999சி. ஸ்ரீனிவாசன்அண்ணா திராவிட முன்னேற்ற கழகம்எஸ். சந்திர சேகர்திராவிட முன்னேற்ற கழகம்
2004என். எஸ். வி. சித்தன்இந்திய தேசிய காங்கிரஸ்எம். ஜெயராமன்அண்ணா திராவிட முன்னேற்ற கழகம்
2009என். எஸ். வி. சித்தன்இந்திய தேசிய காங்கிரஸ்பி. பாலசுப்பிரமணிஅண்ணா திராவிட முன்னேற்ற கழகம்
2014எம். உதய குமார்அண்ணா திராவிட முன்னேற்ற கழகம்எஸ். காந்தி ராஜன்திராவிட முன்னேற்ற கழகம்
இந்த மக்களவைத் தொகுதியில் இடம்பெற்றுள்ள ஒட்டன்சத்திரம் திண்டுக்கல் மாவட்டத்தின் ஒரு நகராட்சியாகும். தமிழகத்திலேயே கோயம்பேடுக்கு அடுத்தபடியாக இரண்டாவது மிகப் பெரிய காய்கறி சந்தை அமைந்துள்ளது. இங்கிருந்து கேரளா, கர்நாடகா உள்ளிட்ட மாநிலங்களுக்கு காய்கறிகள் அனுப்பப்படுகிறது.
தயிர், வெண்ணெய்க்கும் ஒட்டன்சத்திரம் மிகவும் புகழ்பெற்றது. பாலில் இருந்து பிரித்தெடுக்கப்படுவதற்காக சுமார் 600 கடைகள் இருக்கும் மிக பெரிய சந்தை இங்குதான்உள்ளது. இதன் காரணமாக கேரளா, கர்நாடகா, ஆந்திரா மாநிலங்களுக்கு தயிர் மற்றும் வெண்ணெய் அனுப்பப்படுகிறது,
இங்கு விவசாயம் முக்கிய தொழிலாக இருக்கும் நிலையில், மக்காச்சோளம், புகையிலை, காய்கறிகள், மிளகாய், வெங்காயம், நிலக்கடலை, முருங்கை, பருத்தி, சூரியகாந்தி, கரும்பு உள்ளிட்ட பல பயிர்கள்பயிர் செய்யப்படுகின்றன.
முதல் மக்களவை தேர்தல் தொடங்கி தற்போது வரை காங்கிரஸ் 5 முறையும், தமிழ் மாநில காங்கிரஸ் (மூப்பனார்) ஒரு முறையும், அதிமுக 8 முறையும், திமுக 3 முறையும் வெற்றி பெற்றுள்ளன.
1980ம் ஆண்டு மக்களவைத் தேர்தலுக்கு பிறகு, திண்டுக்கல் மக்களவைத் தொகுதியில் திராவிட முன்னேற்ற கழகம் நேரிடையாக களமிறங்கி வெற்றிக்காணவில்லை.
35 ஆண்டுகளுக்கு பின்னர், திமுக இந்த தொகுதியில் நேரடியாக 2019 மக்களவை தேர்தலில் போட்டியிட்டு இந்த தொகுதியை கைப்பற்றும் முனைப்போடு செயல்பட்டு வருகிறது.
காங்கிரஸோடு கூட்டணியின்போது, திண்டுக்கல் மக்களவைத் தொகுதியை இந்திய தேசிய காங்கிரஸுக்கு திமுக அளித்து வந்தது.
அதனுடைய சிறந்த பயனாக 2004 முதல் 2009 என இரண்டு முறை என். எஸ். வி. சித்தன் வெற்றி பெற்றார்.
தண்ணீர் பிரச்சனை, விவசாயம் இங்குள்ள பொது பிரச்சனையாக இருப்பதால், விவசாயிகள் தங்களின் கடன்களை மன்னிப்பது உள்பட பல கோரிக்கைகளை முன்வைத்து போராடிய விவசாயிகளுக்கு எவ்வித முடிவும் கிடைக்காதது இந்த மக்களவைத் தொகுதியில் எதிரெலிக்குமா என்பதை பொறுத்திருந்துதான் பார்க்க வேண்டும்.