சாலை விபத்துகளில் 11 பேர் பலி : 25 பேர் படுகாயம்

தமிழகத்தில் இன்று காலை நடந்த இரு வேறு சாலை விபத்துகளில் மொத்தம் 11 பேர் பலியாகி உள்ளனர். 25 க்கும் மேற்பட்டோர் படுகாயம் அடைந்துள்ளனர்.

கோவையில் இருந்து சென்னையை நோக்கி சென்று கொண்டிருந்த அரசு பேருந்து, இன்று காலை ஏழு மணி அளவில் சென்னையிலிருந்து ஈரோடு நோக்கி வந்துகொண்டிருந்த மற்றொரு அரசு பேருந்து மீது பயங்கரமாக மோதி விபத்திற்குள்ளனது.

விழுப்புரம் மாவட்டம் உளுந்தூர்பேட்டை அருகே நடந்த இந்த கோர விபத்தில் பேருந்துகளின் ஓட்டுனர்கள் உள்பட 7 பேர் சம்பவ இடத்திலேயே பரிதாபமாக உடல் நசுங்கி உயிரிழந்தனர். ஒருவர் மருத்துவமனையில் சிகிச்சை பலனின்றி உயிரிழந்தார். மேலும், இந்த விபத்தில் 23 பேர் படுகாயம் அடைந்தனர்.

விபத்தில் காயம் அடைந்தவர்கள் உளுந்தூர்பேட்டை அரசு மருத்துவமனையில் சிகிச்சைக்காக அனுமதிக்கப்பட்டுள்ளனர்.

இதேபோல், காஞ்சிபுரம் மாவட்டம் இருங்காட்டுகோட்டை அருகே லாரி மீது வேன் மோதி விபத்திற்குள்ளானதில் 3 பேர் பலியாகினர். இரண்டு பேர் படுகாயம் அடைந்தனர். விபத்தில் உயிரிழந்த 3 பேரும் கர்நாடகாவில் இருந்து சென்னைக்கு காய்கறிகள் ஏற்றி வந்த வேனில் வந்தவர்கள் என்பது தெரியவந்துள்ளது.