பிரதிஷ்டை தினத்தை முன்னிட்டு சபரிமலை ஐயப்பன் கோவில் திறப்பு.. சிறப்பு பூஜைகள்..!

சபரிமலை ஐயப்பன் கோவில், மண்டல காலம் மற்றும் மகரவிளக்கு தினங்களை தவிர, மாதந்தோறும் நடைபெறும் வழிபாடுகளுக்காகவும் திறக்கப்படுகிறது. கூடுதலாக, சில முக்கியமான புனித நாள்களிலும் நடை திறக்கப்பட்டு பக்தர்கள் தரிசனத்திற்கு அனுமதிக்கப்படுவது வழக்கமாகும்.

அந்த வகையில், ஒவ்வோர் ஆண்டும் நடைபெறும் பிரதிஷ்டை தினத்தை முன்னிட்டு, சபரிமலை கோவில் சிறப்பு பூஜைகள் மற்றும் அனுஷ்டானங்களுடன் திறக்கப்படும். இந்த ஆண்டு பிரதிஷ்டை தினம் ஜூன் 5-ஆம் தேதியாக இருப்பதால், கோவில் நடை ஜூன் 4-ஆம் தேதி மாலை 5 மணிக்கு திறக்கப்படும்.

பிரதிஷ்டை தினமான ஜூன் 5-ஆம் தேதியின் அதிகாலை 5 மணிக்கு நடை திறக்கப்பட்டு, அந்த நாளுக்கான சிறப்பு பூஜைகள் தொடங்கும். பக்தர்கள் நேர்த்திக்கடன்கள் மற்றும் வழிபாடுகளைச் செய்வதற்காக அந்த நாளில் பெருமளவில் வருவார்கள் என எதிர்பார்க்கப்படுகிறது.

அன்றைய வழிபாடுகள் இரவு 10 மணிக்கு நிறைவடைந்து, நடை மூடப்படும். அதன் பின்னர், ஆனி மாத பூஜைகளுக்காக கோவில் நடை ஜூன் 14-ஆம் தேதி மீண்டும் திறக்கப்படும்.

Edited by Mahendran