இந்தியாவின் 71வது தேசிய திரைப்பட விருதுகள் தற்போது அறிவிக்கப்பட்டு வருகின்றன. இதில், அறிமுக இயக்குநர் ராம்குமார் பாலகிருஷ்ணன் இயக்கத்தில் ஹரிஷ் கல்யாண் நடித்த 'பார்க்கிங்' திரைப்படம், சிறந்த தமிழ் திரைப்படத்துக்கான தேசிய விருதை வென்றுள்ளது.
2023ஆம் ஆண்டு வெளியான இந்த படத்தில் ஹரிஷ் கல்யாண் மற்றும் எம்.எஸ்.பாஸ்கர் ஆகியோர் முக்கிய கதாபாத்திரங்களில் நடித்திருந்தனர். ஒரு பார்க்கிங் இடத்திற்காக இரண்டு குடும்பங்களுக்கு இடையே நடக்கும் சிறிய மோதலை மையமாக கொண்டு இப்படம் உருவாக்கப்பட்டிருந்தது.
இது தவிர, 'வாத்தி' திரைப்படத்திற்கு இசையமைத்ததற்காக இசையமைப்பாளர் ஜி.வி.பிரகாஷுக்கு சிறந்த இசையமைப்பாளர் விருது வழங்கப்பட்டுள்ளது.
இந்த ஆண்டு தேசிய விருதுகள் போட்டியில், நாடு முழுவதிலுமிருந்து 332 திரைப்படங்கள் பங்கேற்றன. அவற்றில், பல்வேறு மொழிகளிலும் விருதுகள் அறிவிக்கப்பட்டுள்ளன.
